Vawiin chawhnu khan Home Minister Pu K Sapdanga Pisaah tunlaia Aizawl khawpui himna chungchang sawiho turin inhmuhkhawm a ni a. He hunah hian Excise Minister Pu Lalnghinglova Hmar pawh a tel a. Sawihonaah hian Police Department, Excise and Narcotics Department, Social Welfare Department hotute leh Central YMA hruaitute ten an hmalak mek theih sawiin chak zawka hmalak chhunzawm dan an rel a ni. Meeting kaihruaiin Home Minister Pu K Sapdanga chuan Aizawl khawpui himna turin Police, Excise leh Central YMA thawhona a pawimawh thu leh, an thawhho țhat avanga lawmawm a tih thu a sawi a. Aizawl khawpui boruak thlirin inlungrual taka thawhho chhunzawm leh hmalak a tul thu a sawi. Excise and Narcotics Department Minister Pu Lalnghinglova Hmar pawhin danin a phalloh ruihtheih thil leh a kaihhnawih khap kawngah sorkarin theihtawp a chhuaha bakah Central YMA an rawn che chhuak țhin chu lawmawm a tih thu a sawi a. Ruih hlo ngai te avanga harsatna awm sut kian kawngah pawh Central YMA nena pheikhai rual taka an kal zel chu a tulin a pawimawh hle a ti.
Department lam aiawhin a khaipa ten report an pe chhunzawm a. Aizawl SP Pu Rex Zarzoliana Vanchhawng vhuan tun hnaia police-in Aizawl khawpui venhim hna an thawh dan report pein chhun zan zawma an duty țhin thu a sawi a, tun hnaiah bik țan an lak nasat dante a sawi. Excise and Narcotics Department Commissioner Pu Z Lalhmangaiha’n an department-in tunlaia Aizawl khawpui leh district khawpui dangah zan lama special drive neia zu leh ruihhlo an ven dan te, tunhnaia ruihhlo man kawnga an hmalakna leh hmun pawimawh bika an duty țhin dan a sawifiah. Pi Lalzarmawii, Commissioner & Secretary Social Welfare Department pawhin Mizorama sorkarin ruihhlo ngai enkawlna hmun a neih dan te, seat awm zat leh an enkawl mekte a report bakah ruihhlo ngai tam zawkte enkawl thei tura sorkar ruahmanna neihte a sawi bawk. Pu Lalhmachhuana, CYMA President chuan khawtlang himna tura YMA hmalak mek dan te, ruihhlo do tura Central Anti Drugs Squad hnathawh dante report pein a țul angin Aizawl khawpuia branch hrang hrangin zan lama venhim hna an thawh dante a sawi a. CYMA hruaitu dangte hnen atang pawhin YMA hmalakna te ngaihthlak a ni.
Home Minister office-a țhut khawmnaah hian tun hnaia Aizawl khawpuia ruihhlo ti țhin khawlaia veivak tam thu te, ruihhlo avanga thihna thleng leh mipui nawlpui himna lam te pawh sawiho a ni a. Ruihlo do kawngah leh Khawpui venhimna kawngah Khawgtlang hruaitute leh Kohhran hrang hrangte pawh thawhho pui theih a pawimawh thu te sawi a ni a. Tunhnaia Țawngțai Bethel Camping Centre ațanga enkawl mek thahnem tak chhuan chungchang te pawh sawi tel a ni. He hunah hian Pu Lalzirmawia Chhangte, Commissioner & Secretary Excise and Narcotics, Pu Lalthiamsanga Sailo DIG (Northern Range) leh sorkar mi pawimawh dangte bakah CYMA hruaitute an tel.
