Vawiin khan Home leh UD&PA Minister nibawk Pu K. Sapdanga chuan Zorinpui leh Solid Waste Management System, Lawngtlai te a hmunah kalin a enfiah a. Dr. Lorrain Lalpekliana Chinzah Adviser to Chief Minister, Pu C. Ngunlianchunga, MLA Lawngtlai West bialtu, Pu C. Lalsawmzuala CEM LADC, Pu Donny Lalruatsanga Lawngtlai Bawrhsap leh Pu PC Lalchunglura, Superintendent of Police – ten an tawiawm a ni.
Pu K. Sapdanga chuan Kaladan Multi Modal Transit Transport Project (KMMTTP) hawn a nih hunah Mizoramin kawng hrang hrangin hmasawnna rahbi thar a kai dawn tiin, a taka hmuh a chakawm tawh hle a ni, a ti a. He kawngpui zawhfel a nih chuan sumdawnna lian zawk kalpui niin, Lawngtlai bakah Mizoram hmun hrang hranga chengte tan hmathatna tam tak a thlen dawn a, chhungkaw tam tak tan eizawnna tha tak a siam dawn a ni, a ti. Hmasawnna hian a chhe zawnga zoram mipuite a nghawng a hlauhawm hle tih tarlangin, tun atanga theihtawpa lo in râlrin leh a tha zawnga hman dan tura lo inbuatsaih chu hna hmasa a neih a ngaih thu a sawi a ni.
Home Minister chuan Mizoram tana chhenfakawm leh malsawmna niturin theihtawp chhuah a tul tak zet a ti a. Malsawmna tura sawrkar hmalakna hi mualpohna thlentu a ni thei tih hriatreng a tul a, malsawmna thlentu ni turin sawrkar, NGO leh zoram mipuite inbuatsaih a pawimawh hle tih a sawi. A bik takin Lawngtlai chu chhim kawtchhuah ropui a ni dawn tih tarlangin, Pu K. Sapdanga chuan neitu thinlung pu tur leh a tha zawnga chhawr tura rilru lo inbuatsaih tlat turin a chah nghal bawk.
UD& PA Minister hian ‘Solid Waste Management System’ Lawngtlai tlawh nghalin hnathawh kal mekte a enfiah a. Lawngtlai khawpuiin bawlhlawh sawngbawlna tha tak a nei tur chu lawmawm a tih thu sawiin, peih fel a nih hunah chuan Lawngtlai khawpuiin faina leh thianghlimna kawngah nasa takin hma a sawn phah dawn a ni, a ti. Mipuiten an mamwhna hriaa, chak leh tha taka hnathawh bakah a hun taka zawhfel a tul hle a tih a tarlang a. Lawngtlai cmipuiten hman an chak tawh hle tih tarlangin, Pu K. Sapdanga chuan chak taka thawk turin contractor – te a chah nghal bawk.
Pu K. Sapdanga hi Aizawl atangin Pu Jacob Lalawmpuia, Director, UD&PA, Pu Lalrinawma, Traite, AIGP, Pu PC Lalduhtlanga, Joint Secretary, Home Department ten an lo tawiawm bawk a. Home Minister hian vawiin vek khan Siaha a oana, Ruihhlo Do chungchangah thutkhawm a neihpui leh dawn a ni.
