Zanin khan Lawngtlai District Football Association- bultumin DC Office kawtzawlah ‘ Lawngtlai East Constituency MLA Cup 2026’ hawnna neih a ni a . Home Minister Pu K. Sapdanga chuan Khuallian niin a hawnga , Dr. Lorrain Lalpekliana Chinzah, Adviser to Chief Minister leh Lawngtlai East bialtu MLA nibawk leh Lawngtlai Bawrhsap Pu Donny Lalruatsanga te chuan an telpui.
Pu K. Sapdanga chuan kalkhawmte hnena lawmthu sawina neiin, hlawhtling tak ni tura ‘Lawngtlai East Constituency MLA Cup 2026’ a hawn thu a sawi a. Lawngtlai East Bialtu MLA leh Lawngtlai District Football Association (LDFA) te hmalakna fakawm a tih thu tarlangin, rah tha a chhuah ngei a beisei tih a sawi a. Lawngtlai thalaite chu ruihlo tlansana, taksa hrisel tura infiamna uar deuh deuh turin a fuih a. District piah lamah Mizoram leh India ram hmun dangah pawh hlawhtlinna an chang thei tih hriaa, beidawng lova thawk turin a chah a ni.Infiamite tan sawrkarin theihtawp a chhuah reng thu sawiin, hma alak zel tur thu a tarlang a. Lawngtlai thalaite infiamna uar deuh deuh tur leh Mizoram bakah India ram tihmingthatu ni turin duhsakna a hlan nghal bawk.
Dr. Lorrain Lalpekliana Chinzah, Adviser to Chief Minister leh Lawngtlai East bialtu MLA nibawk chuan Football chu infiamna a nih liah lamah thiantha siamna, zirlai zirna pawimawh tak pakhat a ni a ti a. Field chhung leh pawna mizia leh hawiherah hawihawmna a pawimawh hle a, infiammite tan thinchhiat a rem lo a ni, a ti. Khelmual chhunga hlawhtlinna chang turin theihtawp chhuah a ngai a, mahni inthun, leh zaidamna te neih a pawimawh hle a, nunchang tha nei chunga Indian thin turin thalaite a fuih a ni. Infiamna hian harsatna hmachhawn dan zirtirna tha tak a pe thin tiin, hring nunah a taka hman thiam a tul hle a ti . Hlawhtlinna chang turin inbuatsaihna tha tak a tul thu tarlangin thalaite chu thawkrim turin a fuih a . MLA Cup chuan thalaite nunah nghawng tha a thlen ngei a beisei thu sawiin, team – tel zawng zawngte duhsakna a hlan nghal bawk a ni.
Zanin hun hmanna hi Pu C. Lalhmachhuana, Hon’ Vice President, LDFA chuan kaihruaiin, Pu C. Hrangthianga, President, LDFA chuan lawmna thu a sawia, Pu Joseph Lalhmingthanga, Hon’ Secretary, LDFA chuan report tawi pekna a nei a ni.
