Vawiin khan Pu K Sapdanga, Home Minister chuan Superintendent of Police Office, Khawzawl a tlawh a, thawktute nen harsatna awmte leh hmalak zel dan tur sawihona hun an hmang nghal. Hemi zawh hian 2nd IR Battalion a tlawh a, sipaite nen inkawmna hun an hmang bawk a ni.
He hunah hian Minister Pu K Sapdanga chuan ruihhlo do chungchangah thu sawiin tunlaia social media a thudik leh dik lo hriat hran a har tawh a, mipui buai lohna turah kan buai phah thin tih a sawi a. Police ten ruihhlo in kan thalai te nun nasa taka a tihchhiat nasat em avangin thapui thawha kan do a ngai tak zet a ni tih a sawi a, mipuite tana fel leh tangkai ni turin a fuih bawk. He ruihhlo do kawngah hian NGO leh mipuite pawh police te tha taka thawhpui theuh turin a chah a, tanrualna nen ruihhlo hi kan hneh ngei theih a beisei tlat thu a sawi bawk.
Kuhva tawlh ruk chungchangah Minister Pu K. Sapdanga chuan thu a sawi chhunzawm a, kuhva tawlh ruk hian kan kuhva rah chingtute leh kan ram economy nasa takin a tibuai thei a, hemi dona kawngah hian police te, NGO te leh mipuite tha taka thawk ho turin a chah a, police ten dan hi khauh taka kengkawh turin a fuih bawk a ni.
Heng a thusawi bakah hian Minister Pu K. Sapdanga chuan SP Office leh 2nd IR Battalion a thawkte kawmna hun a hmang a, an harsatna te leh an mamawh te chungchang sawihona hun a neih pui a, theih ang anga puih zel a tum thu leh mamawh huna biak theih reng a nih thu a sawi bawk.
