Champhaia cham mek Home Minister Pu K. Sapdanga chu nimin chawhnu khan a chanpual Department hrang hrangten Champhai leh a chhehvela hmasawnna hna an thawh te leh Myanmar atanga raltlan te a tlawh kual. Champhai Sub-Headquarters YMA-in Champhai Zion Venga raltlante awmna tur ruahman a tlawh a, Champhai Zote daia Industrial Training Institute a Myanmar atanga Mizorama raltlan lo lut te enkawlna Refugee Camp a tlawh nghal bawk. Refugee Camp a tlawh zawh hian UD&PA Minister ni bawk Pu K. Sapdanga hian a Department hnuaia hmalakna pahnih – Truck Terminal, Champhai Zotlang a mi tun hnaia sak zawh tawh leh , Bawlhhlawh sawngbawlna tur, Solid Waste Management Center, Champhai Mualkawi a mi chu a tlawh a.
Sawrkar department hotute leh khawtlang hruaitute nen inkawmin, heng hmun tihchangtlunna kawnga harsatna la awm te an sawi ho a ni. Champhai Ruantlang hmuna Truck Terminal hi cheng nuai 447 sing 3 sang 3 senga sak a ni a. CFH Consultancy Services, Republic Veng, Aizawl ten a sak hna an thawk a, kumin April ni 6 khan Completion Certificate pek chhuah tawh a ni.
Mualkawi khaw daia Bawlhhlawh sawngbawlna turah hian Bawlhhlawh tawih thei lo sawngbawlna (Dry Waste Processing Shed) leh tawih thei sawngbawlna (Wet Waste Processing Shed) te sak tawh a ni a. Tawih thei sawngbawlna sak nan hian cheng nuai 58 sing 4 sang 8 sen niin; tawih thei lo sawngbawlna sak nan hian cheng nuai 72 sing 3 sang 1 sen a ni a, cheng nuai 52 sing 9 sang 2 senga thawmthat tum mek a ni bawk. Bawlhhlawh sawngbawlna tur khawl hi bun tuma hmalak mek a ni a, kumthar lamah chuan a nihna tur anga kalpui theih tawh tura beisei a ni.
