Vawiin khan Horeb Conference Hall-ah Rev. Dr. K. Thanzauva, Education Consultant hovin Hnahthial khawpui chhunga zirna in hrang hranga Headmaster, Principal leh zirtirtu aiawhte chuan classroom chhunga zirtirna tih hmasawn dan tur – “Meeting on Improvement of Classroom Teaching (Promotion of Lesson Plan)” an nei. Inkhawm hi Pu H. Sangthanga, District Education Officer, Hnahthial District chuan a kaihruai a.
Education Consultant, Rev. Dr. K. Thanzauva chuan kan rama zirna tlahniam hian keini Hnahthial District zirna pawh min nghawng nasa em em a, zirna siamtha tur hian sorkar laipui pawhin nasa taka hma la in SSA te a duang a, kum 14 hnuai lam tan free and compulsary education a kalpui mek a ni a ti a. Hnahthialah Primary School panga a tlawh tawh thu sawiin pakhat deuh chiah luah tlak a awm thu leh kan in leh lo te, kan biak in te a zahpui awm loh em em laiin kan elementary school building te erawh a chhe em em mai hi a dik loh thu a sawi a. Zirna in siamthat ngai a ni deuh vek mai chu pawi a tih thu sawiin hemi chungchangah hian sorkar chu a bul tumtu ber ni mah se, kohhran leh kawtlangte pawh kan zirna a that nan loh chuan a tuartu tur chu kan nih avangin nakin lawka kan ram rawn luahtu tur, kan tu leh fate tan zirna in hi kan tih changtlun a tul thu a sawi a ni.
Rev. Dr. K. Thanzauva chuan kum rei tak education kan hlamchhiah avangin vawiinah hian keini hian kan tuar ta a ni tiin biakinah te, YMA-ah te theih tawp chhuahin kan society siam that tum thin mah ila, kan education system ber a that chuan si loh chuan kan hlawhchham zel tho a rin thu a sawi a. Kan ram siamthat nan a bul berah Zina hi kan siam that a tul thu sawiin zirnain a mamawh, insfrastructure te hi vawi leh khatah kan siam tha nghal vek thei lova, chutih laiin kan hriat sa leh kan kalpui reng sa, classroom teaching lamah tal hma kan sawn theih nan vawiin hun hi buatsaih a nih thu a sawi a ni.
