Zankhat riaka Champhai tlawh turin Tourism Minister Pi Lalrinpuii chuan vawiin tlai khan Champhai a lo thleng a. Circuit House-ah Champhai Bawrhsap Pu VL Remliana hovin sawrkar pisa hotu ten an lo dawngsawng.
Sawrkar pisa hotute nen inkawmna tawi an neihah Pi Lalrinpuii chuan thu sawiin Champhai chu Indo-Myanmar Border luhka anih angin, ruihhlo dona kawngah hmahruaitu ni turin sawrkar hnathawkte a ngen a. Ruihhlo mai bakah HIV/AIDS natna hrikin Mizoramah bu nghet takin a khuar mek tih sawiin, a dona kawngah mimal, pawl, kohhran leh khawtlang anga ṭanrual a ngai tak zet a ni, a ti.
Champhai khawtlangin sawrkar a innghat mai lova, khualzin hip thei Kut an buatsaih chu ropui a tih thu pawh sawiin Tourism Minister chuan Community-based Tourism chu hmasawnna tluantling leh tlo thlen thei tu a ni, a ti a. Mizoram sawrkar chuan Hnahsin Kut chu cheng nuai 10 in a ṭanpui tih a tarlang bawk. Pi Lalrinpuii hian sawrkar hnathawk te chu danglamna thlen thei tu an nih in hre reng a, ṭhahnemngai taka hnathawk zel turin a chah bawk a ni.
Health Minister Pi Lalrinpuii hian naktuk zing hian District Hospital, CMO Office leh Nursing School te a tlawh dawn a. Chhunah Hnahsin Kut lamah hun a hmang ang a, he mi hnu hian Champhai chhuahsanin Aizawl a pan ang.
