Mizoram Sawrkara Health & Family Welfare Minister Pi Lalrinpuii chuan vawiin khan Nursing School Lungleiin 30th Batch Capping & Lamp Lighting leh 27th Batch Graduation hun an buatsaih chu Khuallian niin a hmanpui.
Khuallian Pi Lalrinpuii chuan Nursing School Lunglei Nursing College-a hlan kaina tur lungphum a hawng hmasa a. Khuallian hi Lunglei South Bialtu MLA Pu Lalramliana Papuia leh Lunglei Municipal Council (LMC) Chairman Pu Lalzuithanga te’n an ṭawiawm a ni.
Nursing School Lungleia zirlai tharte lak luhna leh zirlai chhuakte thlahnaah hi Khuallian Pi Lalrinpuii chuan Mizoramah nurse mamawhna a sang hle tih sawiin, a zir chhuakte leh zir mekte chu hmasawn lehzual tura inzir chhunzawm zel turin a chah a. Mizorama hriselna kaihhnawih tihchangtlunna tur leh Health Department hmasawnna turin sawrkar chuan theih tawp a chhuah mek tih a sawi a. Doctor-te’n anmahni maiin damlo an enkawl thei lo va, nurse-te puihna an mamawh tih sawiin, damlo enkawl chungchangah nurse-te an pawimawh rualin, mawhphurhna lian tak an nei nghal a, an ṭawngkam chhuak ringawt pawh mi tam tak tan hahdamna a tling ṭhin a, damdawi ina damlo enkawl piah lamah, pawn lamah pawh hriselna atana pawimawh ber faina hna thawktu an nih tel a ṭul tih a sawi a. Zirlai tharte chu theih tawp chhuaha zir tura fuihin, zir chhuak tate pawh hna thawka hmun hla zawk leh hlawk zawk, ram pawn lam thlenga pan ngam turin a fuih bawk.
