Health Minister Pi Lalrinpuii chuan National Health Mission hnuaia hmalakna pakhat, National TB Elimination Programme leh Piramal Swasthya tangkawp buatsaih ‘TB Free Workplace Initiative’ chu Mizoram Sawrkar office– MINECO ah a hawng a. He hun hi Chief Secretary Pi Renu Sharma, Health Secretary Pi Sangchhin Chinzah leh NHM Mission Director Pu Eric Zomawia te bakah Health & Family Welfare Department a thawktuten an hmanpui a ni.
Khawvel pum ah TB umbo beihpui thlak mek a ni a, Kum 2025 ah chuan TB natna tihrem hman tumin kawng hrang hranga hmalak a nih tawh hnuin ‘TB Free Workplace Initiative’ hi tun tum a hmalakna turin duan thar a ni leh ta a ni. He hmalakna kaltlang hian thawktute chuan dam lo leh TB inringhlel te chauh endik tawh lovin, mipuite chu an hnathawhna hmuh ah kal chilh a, a duh apiang tan a test kalpui tum a ni.
He hunah hian Minister Pi Lalrinpuii chuan, “Mizoram hi TB umbona kawnga hmalaknaah India ram a Model State ni turin Sawrkar laipuiin min rawn thlang a, State dangte entawn tur kan nih avangin kan hmalak dan tur te hi uluk tak a kan duan a ngai a, hetiang hmalakna innovative deuh mai kan official ten an lo duang chhuak hi a lawmawm ka ti hle a ni” tiin a sawi a. Theihtawp chhuah a TB umbo a nih theih nana thawhhopui ah Mizoram mipui zawng zawng a sawm bawk a ni.
He hmalakna hnuai ah hian ‘Portable digital X-ray machine’ leh AI assisted diagnostic software hmangin TB vei leh vei loh hi Doctor ten rang takin an endik nghal thei a. Vawiin ah pawh hian nilengin MINECO ah chuan a duh apiang tan a free in test hi an kalpui a, hnathawhna hmun hrang hrangah pawh la kalpui zel tur a duan a ni.
