Mizoram sawrkar a Health & Family Welfare Department changtu Minister Pi Lalrinpuii chuan nimin khan Electric veng Hnahthial-ah Khuallian niin ‘National Deworming Day’, February Round a hman pui a, South Tuipui Bialtu MLA Pu Jeje Lalpekhlua chu Khualzahawm a ni. Minister Pi Lalrinpuii chuan kalkhawmte chu chibai bukin vawiin programme chu hriselna lama hmasawnna thlentu a nih ngei theih nan duhsakna a hlan. Thlai leh eitur silfai te, tui thianghlim chauh in te,inthiarna leh a hmunhma thianghlim taka enkawl te, in leh a vel vawn fai leh bawlhhlawh tha taka sawngbawl thin tur tih chu rulhut do nan inhrilhhre thar leh ila, tihtakzetin tan lak thar a tul hle a ti. Khuallian Pi Lalrinpuii chuan Hnahthial District Hospital building changtlung tak, cheng vaibelchhe 17 man sak thuai tura peihfel a nih tawh thu leh health and wellness centre, Electric veng-a sak tur a nih thu te tarlangin damlo leh mipui vantlang tan chhenfakawm tak a nih a beisei thu a sawi. Pi Lalrinpuii chuan ZMC chu hospital changtlung leh thianghlim tak a ni a, mipuiin pan tam se, civil hospital chep lutuk tih zangkhai phah nan leh thawktute indaihzai zawk nan mipuiten ZMC pan nachang hre zual zel se, a ti a . Zoram Medical College thuam that nana Chief Minister in immediate relief atan cheng vaibelchhe 1.4 a ruahman sak thu te tarlangin health sector lama harsatna tam tak a phuhruk theih a beisei thu a sawi.
National Deworming Day-a a thusawinaah hian Minister Pi Lalrinpuii chuan Hospital a thawk-te chu fakawm a tih thu tarlangin theihtawp an chhuah thinnaah lawmthu a sawi a, an hna chu mipui rawngbawlna a ni tih hre reng tura chahin an awmna hmun apiangah lungawi takin theihtawp chhuah thin turin a chah. SouthTuipui bial in MLA chak tak an nei chu an vannei hle tiin district in hma a sawn zual zel theih nan mipuite thawhhona a ngen nghal bawk. Khualzahawm Bialtu MLA Pu Jeje Lalpekhlua pawhin thu sawiin a bik takin zirlai naupangte chu an hriselna ngaipawimawh zual zel turin a chah a. Taksa tana hrisel lohna tam tak thlen thei tu leh naupang thanglaite than tithu theitu chu Rulhut a ni a, inkai darh awl tak a ni tih hriain, Rulhlut hlo ei chu ngai pawimawh hle turin a chah. Tin,hriselna kawngah taksa invawn fai te, ei leh in uluk te leh insawizawite a pawimawh tih hre reng turin zirlai naupangte a chah bawk. Hlawhtling tur chuan hrisel a pawimawh hle tiin mitinin hriselna ngai pawimawh thar a, zirlai naupangte pawh faina leh taksa insawizawi hlutna hrethar leh turin leh eng kawngah pawh kal dawn se, lehkha thiam a pawimawh hmasa a ti a, lehkha zir thlahthlam ngai lo turin leh theihtawp a tang zual sauh sauh turin a fuih bawk.
National Deworming Day ah hian Pi Micky Lalenkawla, DEO/DPC, Hnahthial chuan Keynote presentation in NDD pein rulhut laka inven theih dan kawng te a sawi a , Dr Lily Chhakchhuak, Jt Director (FW) cum State Programme Officer ( RCH) pawhin thusawi tawi a nei bawk. Vawiin National Deworming Day behchhan hian zirlai naupangte hnenah deworming tablet semchhuah niin Dr Lalsanglura, Sr MO District Hospital chuan lawmthu sawiin hun a khar a ni. Vawiin February Round of NDD pual hian Naupang kum 1-19 inkar te hnenah rulhut damdawi sem a ni a,vawiina ei remchang lo te tan February ni 16 (mop up day) ah sem leh a ni dawn a ni. National Deworming Day hi 2015 atang khan hman tan niin India ram pumah (pan India) 2016 khan hman tan a ni. February round Leh August round-te a then niin kum tinin vawi hnih hman thin a ni.
