Health & Family Welfare Minister Pi Lalrinpuii chuan tukin khan Hnahthial District Hospital tlawhin an hmalakna leh mamawh an neih te a enpui. Minister Pi Lalrinpuii chuan kalkhawmte chu chibai a buk a, Hospital-a thawkte hmalakna hrang hrang ngaihthlak tak te chu chhuanawm ti hlein an inpekna ah lawmthu a sawi a, a bik takin malaria eradication a an hlawhtlinna te chu chhinchhiah tlak a ti hle a, nuaibo thei tura tan la chhunzawm zel turin a chah. Minister chuan a department hmalakna hrang hrang tarlangin National Health Mission hnuai atangin District Hospital 10-ah thisen/zun etc test-na Laboratory changtlung tak din tuma hmalak mek a ni a, a thawhkhatna atan district pathum – Siaha, Hnahthial leh Champhai ah te hmalak hmasak mek a nih thu te, thawktu indaihloh zualna phuhruk tur zirchian mek a ni a. Nurse thahnem tak lak belh tumna chu Sawrkarah thlen a nih mek thu te, Zoram Medical College thuam that nana Chief Minister in immediate relief atan cheng vaibelchhe 1.4 a ruahman sak thu te tarlangin health sector lama harsatna tam tak a phuhruk theih a beisei thu a sawi.
Hnahthial-ah District hospital changtlung tak cheng vaibelchhe 17 man sak thuai tura peihfel a ni tawh a ti a,chumai bakah Health & Wellness Centre pawh Hnahthial electric veng-ah sak a ni dawn tiin mipuiten tangkai taka an hman ngei a beisei thu a sawi bawk. Pi Lalrinpuii chuan ZMC chu hospital changtlung leh thianghlim tak a ni a, mipuiin pan tam se, ti lùn thiam se, civil hospital chep lutuk tih zangkhai phah nan leh thawktute indaihzai zawk nan mipuiten ZMC pan nachang hre zual zel se, a ti bawk. Minister chuan kalkhawmte chu fuihin sorkar hnathawk chu awm hmun ngh?t a neih theih loh a ti a, mipuite tana rawngbawl an ni tih reng renga lungawi taka sawnna hmun apiangah awm thei turin a chah. Hospital a thawkte zawng zawng chu fuihin an rawngbawlna theuh ngai pawimawh a, theihtawp chhuah theuh turin a sawm bawk a ni.
South Tuipui Bialtu MLA Pu Jeje Lalpekhlua pawhin thu sawiin Minister viak tha tak an nei chu lawmawm a ti hle a. a bial chhung mipuite tana hamthatna hrang hrang a ngaihtuahpui thinna ah lawmthu a sawi bawk. Thawktute pawh fuihin damlote chu hriattthiamna nen lo dawngsawng thin turin leh mi bawrhsawm leh rethei zawk te tana ding fo turin a sawm bawk. Vawiin inkhawm tawi buatsaihah hian District CMO Dr Lalrengpui Ralte chuan kumin financial year chhunga an hmalakna tawi report a pe a. Minister hi District hospital staff te , NGO aiawhte leh chanchinbu miten an tawiawm bawk. Health Minister Pi Lalrinpuii hi vawiin hian Electric veng Community hall ah National Deworming Day a hmanpui anga, chumi zawh chuan South Vanlaiphai a PHC tlawh turin a chhuak nghal dawn a ni.
