Vawiin khan Mizoram Legislative Forum on HIV/AIDS chu Pi Lalrinpuii, Health Minister, an Chairman ni bawk kaihhruaina-in SAD Conference Hall, MINECO-ah thutkhawm a ni. Pi Lalrinpuii chuan tun Sawrkar tharah Legislative forum on HIV /Aids thutkhawm vawikhatna neih theih a ni chu lawmawm a tih thu sawiin member kalkhawm zawng zawngte chungah lawmthu a sawi a. Tunhma chuan he natna hi mi awmtha duh lo leh ruihhlo ngaite chauh kai theih tura kan ngaih laiin tunah chuan he natna hi kan rin loh pui pui te’n an kai tawh a, kan fimkhur tlan a pawimawh takzet thu a sawi. Member kalkhawmte, a bik takin Legislators MLA te chu an bial theuha an thusawina-ah uar taka sawi thin turin a chah a ni. Meeting-ah hian Mizoram HIV dinhmun sawihona neih niin HIV Estimation 2023-in a tarlan angin, Mizoram Adult HIV Prevalence chu 2.73% a nih laiin National Adult HIV Prevalence chu 0.2% a ni thung a. Kum 1990 atanga August 2024 thleng khan Mizoram-ah HIV kai mi 31461 hmuhchhuah tawh niin heng zinga mi 2541 te chu nu naupaite atanga hmuhchhuah an ni. HIV inkaichhawn tamna ber chu invenna tel lova sex hman niin HIV kai hmuhchhuah zawng zawng atanga 63.93% an tling a. Inchiu-na hmanrua (needle/syringe) inhman tawm atanga HIV kai hi 30.80% zet an ni bawk. Tun dinhmunah HIV kai enkawlna (ART) la mek mi 16661 an awm a. HIV kai boral hi mi 5277 an tawh thu Meeting-ah hian tarlan a ni.
Vawiin thutkhawmah hian District Hospital-a HIV/AIDS leh a kaihhnawih enkawlna pual bik hmunhma sawiho niin tun dinhmunah a thlawna HIV test-na hmun (ICTC) 39 a awm mek a. HIV kai te enkawlna hmun (ART Centre) hi hmun 14-ah a awm bawk a. ICTC leh ART Centre te hi District zawng zawngah dah vek a ni. Meeting-ah hian HIV positive, ART damdawi ei lai ei chhunzawm lo, an mahni awmna chhui zui hleih theih loh an awm thin chu pawi an tih thu tarlan niin an Aadhar nen a thlunzawm dan ngaihtuah nise tih a ni a. National AIDS Control Organisation (NACO) rawn chungin mi zawng zawng tan HIV test theihna tur MSACS hotute’n kawng lo dap se tih a ni bawk. He natna hi kan ram leh hnam hnukkhawih thei thil a nih avangin he natna veite hmusit leh endawng lova, nu naupai laiin HIV test an tih ngei ngei a ngai ang hian Mandatory Test tih theih dan Policy duan emaw siam that emaw nise tih a ni bawk.
Mizoram Legislative Forum on HIV/AIDS hi Pi Lalrinpuii, Health Minister Chairman-na hnuaiah awm mekin Member Secretary hi Project Director, MSACS a ni a. Member-ah hian MLA 25 an awm mek bawk. He hunah hian MLA Constituency tina HIV darh zel lohna tura MLA te nena thawhhona tur kawng hrang hrang te sawiho nghal a nih bakah Dr. Lalthlengliani, Project Director, MSACS chuan a lem nena entirin HIV/AIDS a kan ram dinhmun sawifiahna a nei bawk a ni. Vawiin meeting-ah hian MLA, Advisor to CM pahnih, Opposition MLA pathum bakah H&FW Secretary leh MSACS a thawktute an tel a. Quarterly-in Meeting hi Review leh thin tur a ni a. October Ni 23-ah harsatna dang a awm anih loh chuan thutkhawm leh tura ruahman a ni.
