Health Minister Pi Lalrinpuii’n SEDP sum cheng vaibelchhe 150 atanga Health Care bill tur cheng vaibelchhe 40 dah hran chu sem chhuah ala nilo a ti.He thu hi vawiina Assembly thutkhawm zawhna leh chhanna hunah sawiin Pi Lalrinpuii chuan Health Care bill ba pe chhuak turin sawrkar an chan hlimah Chief Minister Pu Lalduhoma’n cheng vaibelchhe 15 a pe chhuak a ti a, tun dinhmunah Health Care bill ba cheng vaibelchhe 45 nuaih 59 sing 61743 a awm mek a ti a, SEDP sum atanga pek tur cheng nuaih 40 a awm tih sawiin heng pek zawh hunah hian a bang cheng vaibelchhe 5 leh nuaih 6 vel ala awm dawn a ti a, heng ba zawng zawng hi Financial Year hma in pek chhuah vek tum a ni tih a sawi.
Minister chuan Nausen kum khat hnuai lam thi chu nau piang sang 1 zela 3 ang a ni a ti a, National Health Mission atangin nasa taka ti tlem tura tan lak a ni tih a sawi. Minister chuan MPSC kaltlanga Doctor lak tumna a awm a ti a, Specialist 7 leh Medical Office 9 lak tum a ni tih sawiin tun dinhmunah Mizoramah CT Scan tih theihna chu hmun 4 a awm a ti a, Aizawl Civil Hospital, ZMC, Mizoram State Cancer Institute leh Lunglei Civil Hospital ah te CT Scan tih theih a ni tih a sawi.
Pi Lalrinpuii chuan MRI tih theihna ZMC ah chauh awm chu Aizawl Civil Hospital ah Smart City kaltlangin MRI tih theihna tura ruahmanna kalpui mek ani tih a sawi bawk.
