Kum 2024 Christmas vuakvet chhungin mipui-in halpuah leh halmawi hal chungchanga sorkar thuchhuah tha taka an zawm avang leh buaina leh harsatna awm lo tura an thawhpuina avangin Mizoram Police chuan mipui hnenah lawmthu an sawi.
IGP (Headquarters), Chief Public Relation Officer (CPRO) ni bawk Pu Lalbiakthanga Khiangte chuan vawiin khan thu chhuahin mipuite’n ralmuang taka hunpui hman chhunzawm a nih theih na’n Mizoram Police-te’n theihtawp chhuah zelin, district Police Duty pangngai bakah hunpui chhunga Aizawl khawpui chhung vil turin Senior Police Officer rual, Addl. S.P atanga Selection Grade mi 12 leh Zonal Officer (Dy. S.P) mi 4 ruat an nih bawk thu a sawi a.
Kumthar lo thleng turah hian Mizoram Police chuan ralmuang taka mipuite’n hun an hman theihna’n theihtawp a chhuah leh dawn a, mipuite pawh sawrkar thu zawm a, halpuah leh halmawi lam chite hal lova tha taka Police-te thawhpui zel turin tih tak zeta an sawm thu an thuchhuah chuan a tarlang a ni.
