Vawiin khan Saitual District-a hmasa ber ni turin Govt. Saitual High School Assembly hall-ah Pipe Band Academy leh Rani Lakshmi Bai Atma Raksha Prashikshan (Self Defence for Girls programme) hawnna neih a ni a, Saitual Bawrhsap Dr. Lalngura Tlau, District Education Chairman ni bawk chu khuallian niin hawnna hun a hmanpui. He hunah hian Dr. Lalngura Tlau chuan thu sawiin Saitual district chu district dangte ruala ke a pen ve theih nana Pipe Band Academy leh Self Defence zirna duan a ni chu lawmawm a tih thu a sawi. Bawrhsap chuan Sawrkar ni pawimawh tak tak Independence Day leh Republic Day-ah te pawh pawn lam mite tihbuai ngai lo a District chhunga High school naupangte ngei atanga Pipe Band an nei ve thei tawh tur chu a lawmawm a ti a, zirlai naupangte pawh thahnemngai taka zir tura fuihin, Pipe Band intihsiakna hrang hrangah te pawh inhmakhua chho zel turin a chah bawk a ni.
Tunlai khawvelah hmeichhiate an him lo em em a, chuvang chuan invenhim dan inzirtirna Rani Lakshmi Bai Atma Raksha Prashikshan (Self defence training for girls) buatsaih a ni chu a lawmawm a tih thu Bawrhsap chuan a sawi a. Taekwondo chu tute tan pawh thiam a tul tih sawiin, zirlaite pawh mahni diknaa huaisen taka tang ngam turin a chah bawk a ni. Kum 2022 khan Mizoram Taekwondo Association of Mizoram (MATA) te leh SPD chuan inremsiamna neiin, Rani Lakshmi Bai Atma Raksha Prashikshan ( Self defence training for girls) Saitual District-ah pawh bul an lo tan ve tawh a. Kuminah erawh chuan District kuta dah niin, District-in a kutken chho tan ta a ni. Zirlai hmeichhia UPS (Middle School) atanga Higher Sec. School zirlai zawng zawngte tan he programme hi duan a ni. He programme hi zirlaiten an hlawkpui thin hle a, zirlai thenkhat chu he programme kaltlang hian Taekwondo game luhchilhin hlawhtlinnate pawh an lo chang tawh a ni.
Self defence training hi Saitual district chhunga middle, high school leh higher zirlai hmeichhiate tana ruahman a ni a, Taekwondo zirtirtu (blackbelt) hi mi pa 5 an awm a, chungte chu- Lianthangpuii, Lalliankimi, Zohmingthangi, C. Lallawmsanga leh Zoramsanga te an ni a, class hi vawiin atanga tan tura ruahman a ni.
