Vawiin khan Govt Comprehensive Middle School Kawlkulh zirlaite chuan Khawzawl Bawrhsap pisa an tlawh a. Zirlaite hi Bawrhsap pisa hnathawh dan kalphung te hrilhfiah leh zirtir an ni. Zirlaite hi Khawzawl Sub Deputy Commissioner Pu Elijah LH Sanga hovin Bawrhsap pisa-a thawktu ten an lo dawng sawng a, room hrang hrang fangkualin pisa kalphung tlangpui te hrilhfiah an ni. Zirlaite hi DC, Addl DC, SDO (S), Election Officer thutna te bakah Meeting Hall, Auditorium leh Office Branch hrang hrang te fan kual pui an ni a, Deputy Commissioner hnathawh tlangpui hrilhfiah an ni bawk.
Hei bakah hian Lok Sabha Inthlanpui a hman Electronic Voting Machine te dahthatna ‘Strong Room’ awm dan chu a vengtu Central Armed Police Force te kaihhruaina hnuaiah hrilhfiah an ni a. CAPF ten Strong room an ven dan leh party hrang hrang aiawh ten Strong Room kalh (seal) a nih hnu a, an sign hnan tlat dan te hrilhfiah an ni a.
Vote chhiar ni – June ni 4 a vote chhiar dan tur te, Strong Room atanga Counting Hall-a EVM lak chhoh dan tur te, Strong Room atanga Counting Hall CCTV-a cover vek a nih dan te bakah Strong Room venhim a nih dan – a chhung ber (inner most) CAPF-in an ven dan leh a dawttu (2nd cordon) Mizoram Armed Police ten an ven dan te hrilhfiah an ni.He hunah hian Govt. Comprehensive Middle School, Kawlkulh atangin zirtirtu leh zirlai 58 an tel a ni.
