Mizoram larsap kal chhuak Dr. Hari Babu Kambhampati chuan nimin tuk dar 8 khan Aizawl Raj Bhavan a chhuahsan. Larsap hi a secretary leh Raj Bhavan hnathawk dangte’n an thlah a. Chawhma dar 9 velah Lengpui tumhmun thleng thla-in hetah hian chief minister Pu Lalduhoma, assembly speaker Pu Lalbiakzama, home minister Pu K. Sapdanga leh PWD minister Pu Vanlalhlana te bakah chief secretary Pu Khilli Ram Meena, DGP Pu Anil Shukla te bakah Aizawl bawrhsap, SP leh state protocol officer-te’n lo dawngsawngin Police-te’n chawimawina sang ‘guard of honour’ an hlan a. Lengpui tumhmuna amah thlahna inkhawmah hian Pu Kambhampati chuan Mizoram a cham chhunga tawiawmna leh duhsakna hrang hrang a dawn thin avangin lawmthu a sawi a.
Mizoramin hmasawn tura theihna nasa tak a neih thu leh hengte hi chak taka bawhzui a ngaih thu sawiin, inthlanna leh assembly inkhawm kalpui dante chu ram chhung hmun dangte tana entawntlak tak a ni, a ti a. Mizo thalaite’n theihna leh thiamna an neih that thu sawiin, thiam thil zirna kawnga intuaihriam leh State pawna hna thawk thei tura hmalak zel a tul thu a sawi a ni. Chief Minister Pu Lalduhoma pawhin he hunah hian Mizoram tana tha leh tui a lo sen tawhnate avangin larsap hnenah lawmthu a sawi a. A hna thar tur atan duhsakna a hlan bakah remchang hmasa bera Mizoram rawn tlawh leh turin a sawm bawk a ni. Larsap kalchhuak hi chawhma dar 10 leh minute 15 khan Bhubaneswar panin a thlawk liam ta a ni.
Ruat a nih angin naktukah Bhubaneswar Raj Bhavan-ah thu tiam tira Odhisa larsap tura lakluh a ni dawn a ni. Puan tawh angin Pu Kambhampati hian July ni 19, 2021 khan Mizoram larsap hna a chelh tan a, Pu P. S. Sreedharan Pillai a rawn thlak a ni. A hun chhung hian Mizoram hmun hrang hrang a tlawh kual a, Mizoram hmasawnna atana rilru leh ngaihtuahna seng tak ni a ngaih a ni a. A bikin sorkar laipui-in mirethei zawkte khaichhuahna atana ruahmanna a siamte Mizoram a a mamawhte’n hmang tangkai tawk lo leh hre tawk lova a hriat avangin hetiang lam hi thahnemngai takin a tlangaupui thin a ni.
