Mizoram Larsap Dr. Hari Babu Kambhampati an Mizorama hmasawnna ruhrel siam nan leh hmasawnna hrang hrang atan CSR Fund hman tangkai a pawimawh thu a sawi. Vawiin chawhmaa Health & Family Welfare Minister Pi Lalrinpuii, Adviser to CM (Finance & Planning) Pu TBC Lalvenchhunga, ZMC Director Dr. John Zohmingthanga leh Dr. Haroon M. Pillay, Neurosurgeon, Silverline Hospital, Kochi-te Raj Bhavan Aizawl a kawmna ah he thu hi sawiin Larsap chuan CSR Fund hman tangkai a nih theih nan Public Sector Undertaking (PSU) hrang hrangah rawtnate thlen zung zung a tul thu a sawi a, Prime Minister-in PSU te chu hmar chhak State tan an CSR fund-te hmang uar tura a chah thu sawiin, hei hi remchangah hmanga fund hai chhuah dan kawng ngaihven nasat lehzual a tul hle a ni a ti bawk.
Thutkhawm ah hian Zoram Medical College (ZMC) a Neurosurgery Department din a nih theih dan tur chungchang sawiho a ni a, Health Minister Pi Lalrinpuii chuan hriselna kawnga hmasawnna tura theihtawp chhuah mek zel a nih thu sawiin, ZMC-ah Neurosurgery Department awm theih nana hmalak mek bakah Cardiothoraco Vascular Surgery OT Unit, IVF Centre leh tul dangte a awm thei nana tanlak chhunzawm zel a pawimawh thu a sawi a. Health infrastructure tihchangtlun a nih theih nana Governor hmalakna leh thahnemngaihna chu fakawm a tih thu a sawi bawk.
He hunah hian Mizoram mipuite mamawh em em Neurosurgery Department ZMC-a hawn a nih theih nana hmalak tul hrang hrangte sawi ho a ni a. Hmunhma thuhlaah harsatna a awm loh thu tarlan niin, hemi atana sum mamawh zat tur leh detailed project report proposal siamte thlirhoa pawm a ni a. Hemi tur hian Indian Oil Corporation Ltd. te inhuam angin CSR fund dil ni se, a ranglamin detailed project report proposal thawna ngaihven zui ni se tih a ni.
