Mizoram Governor Dr. Hari Babu Kambhampati chuan vawiin chawhma dar 10:30 khan Mizoram tlawha cham mek Chief Information Commissioner of India Pu Heeralal Samariya, IAS (Rtd.) chu Raj Bhavan-ah kawmin RTI Act chungchanga pawimawh hrang hrangte a sawipui. Dr. Hari Babu Kambhampati chuan Mizoram chu State nuam leh ralmuang, sik leh sa nuam leh tourism sector-a theihna nasa tak nei a nih thu sawiin, Sawrkar tha, rinngam leh langtlang siam kawnga pawimawh tak, Right to Information (RTI) Act pawh mipuite’n an hmelhriat chhoh zel thu leh tangkai taka hman a nih thu a sawi a. RTI Act buaipuitute chu mipuite’n information dik leh rintlak an hriat zel theih nana theihtawp chhuaha hma la zel turin a chah a ni.
Chief Information Commissioner of India Pu Heeralal Samariya, IAS (Rtd.) chuan hmun dang ngaihtuahin Mizorama RTI hmanga dilna lutte hun bituk ni 30 chhunga tha taka chinfel nghal zung zung a ni thin leh, za zela 1 aia tlemin thuneitu sang zawk first appellate authority leh second appellate authority an thleng chu lawmawm a tih thu sawiin, hei hian RTI Act buaipuitu Official, NGO, VC/LC leh mipuite’n he dan hi an ngaihven tlang tih a tarlang a ni, a ti a. RTI Act chu Sawrkar tha siam kawnga hmanraw pawimawh tak a nih thu sawiin, Sawrkar laipuiah kum tin RTI application 20000 vel second appeal kaltlanga dawn a nih thu leh case tam zawk chu a hnuai lamah chinfel a nih thin thu a sawi bawk.
He huna tarlan a nih dan chuan Mizoramah financial year hmasa 2023-2024 chhung khan RTI Act hmanga dilna lut 5741 awmin dilna lutte chinfel zel niin, second appeal hmanga State Information Commission-a lungawilohna thlen chu 1% pawh a tlinglo a, insawifiah tura koh an nih hmain heng zinga 90% te hian RTI Act hmanga information diltu hnenah chhanna kimchang an pe vek hman a ni. Chief Information Commissioner of India hi Mizoram Information Commission-a Chief Information Commissioner (CIC) Pu John Neihlaia, IPS (Rtd.) leh Information Commissioner (IC) Pu Mangjangam Touthang, IIS (Rtd.) te’n an tawiawm a ni.
