Vawiin khan Raj Bhavan Durbar Hall-ah Governor Dr Hari Babu Kambhampati hovin Mizoram chhunga Kawlphetha tam zawk siam tura hmalakna leh hmachhawp sawihona neih a ni a. He hunah hian Power Minister Pu F. Rodingliana pawh a tel a. Power & Electricity Department hotute, NEEPCO hotute leh Household Solar Electricity thlun hna thawktu private company aiawh ten Power Point Presentation an pe a. Uluk takin hmaklakna kal mek te thlirlet a ni a, chak zawka hmalak dan tur te sawiho a ni bawk. Meeting kaihruaitu, Governor Dr Hari Babu Kambhampati chuan Kawlphetha siamchhuah leh intodelh chu Mizoram tana sector tihhlawhtlin hmasak ngai a nih thu a sawi a. Mizoramin Nizung chakna leh Tuiluang chakna hmangin a siam chhuah theih zat tam tham tak ni mahse, current kan hman nat lai ber hun ( Peak power demand) 160 – 200 MW kan la siamchhuak hlei thei lo chu tan lak a ngai tih a sawi. Hydel Project tenau siamna atan sum tam tak Mizoramin a hmang thin chu tuna kan neih tawhsa atang hian a hlawk lo a, tunah phei chuan Loan liantham tak lak a Hydel Project te nau siam chu Mizoram sum dinhmun ngaihtuah in tih chiah a ngaih loh thu a sawi. Mizoram sawrkar sum sen ngai lova Company lian zawk te Hydro Project liantham siam tura kohluh kan tum a tul tih sawiin hemi atan hian kan lui luang te’n Kawlphetha an siamchhuah theih zat dik tak kan chhutchhuah a tul a. Power Plant siamna atana bungraw lian tham tak tak la lut turin Aizawl to Vairengte inkar kawngpui chu 4-lane ah a rang lama kan siam tir a ngai a ti. Governor chuan kan kawng neih te a len tawk loh avangin man to uchuak tak takin bungraw lian kan la lut lo thei loa, hei hian kawng tinrengah hmasawnna ruhrel din a ti hautak hle a ni tih a sawi.
Mizoram mipuite zingah Rooftop Solar Connection neih dan te, a hlawkna te, man tlawm zawka thlunna(subsidy) neih chungchangah te inzirtirna a tam tawk lo tih sawiin Nodal Agency NEEPCO leh Private Vendor te chu Awareness Campaign nasa zawka ti turin a chah a ni. Power Minister F.Rodingliana chuan MIzoramin Kawlphetha intodelh project liantham deuh pahnih Tuirini Small Hydel Project (24 MW) leh Revised Tuivai HEP (150 MW) siam chungchanga hmalakna kalpui tawh chin te a sawi hmasa a. Tuiluang chakna hmanga Kawlpheta siamchhuah bakah Nizung chakna hmanga Kawlphetha siam tura theihtawp an chhuah thu leh Mizoram hmun kilkhawr zawkah te thlenga Solar Plant siam an tum dan te pawh a sawifiah bawk a ni. Power Minister chuan Power lei chungchang, sum hman zat te sawiin Electric Current Bill atanga sum an khawn pawh a lut tha tih a sawi a. Hetih lai hian Sawrkar Department lian deuh Power hmang na deuh te an awm a, heng atang hian a hunah electric current chhit man a lut hlei thei thin loa harsatna a siam thin tih a sawi a, thingtlang khaw thenkhatah thawktute indaihlohna avangin current chhit man bill a lut tha vak lo tih a sawi bawk.
Power Minister hian Transformation loss tih tlem nan Transformer hlui leh overload te thlak hna thawh mek a ni tih a sawi a, transmission loss pawh tihziaawm nan electric hruipui thlun hna thawh mek a ni a ti. Hruipui thlun hna thawhnaah hian hmun thenkhatah Forest Clearance-ah harsatna an neih avanga hna thawh a ran theih loh thu a sawi a. Software tha leh Smart meter hmangin Bill dik tawk lo avanga sum hlauh awm thin pawh tih ziawm tum a ni tih a sawi tel bawk. P&E Engineer te report pekin a tarlan dan chuan Mizoramah Kawlphetha 3500 MW tuiluang chakna hmanga siam theih a ni a. Kum khat chhungin Mizoram ni 300 vel chu nieng, kawlphetha siamna atan hman tlak awm niin chhut a ni a. National Institute of Solar Energy(NISE) chhut dan chuan Mizoramah Nizung chakna hmangin Kawlphetha tam tham tak siam theih a ni a; hei hian 9.09 Global Warming Potential a hen angin a chhut a ni.
Tunah hian P&E chuan Project lian tham deuh 12 – hruipui thlun, tower ( electric ban lian chi) leh Sub station siam hna ang te a kalpui mek a. Solar Projects bikah 10 MWo Grid Connected SPV Power Plant Thenzawl chu NABARD Loan Rs 7107 leh SMS Rs 374 Lakh hmangin thawh mek a ni a, PM-Surya Ghar : Multi Biji Yojana(Rooftop Solar Scheme kalpui mek niin rtspower.mizoram.gov.in leh pmsuryaghar.gov.in atanga dil theih a ni. Tun dinhmunah dilna 506 a awm mek. Sawkar Pisa chunga Rooftop Solar kalpui mek a ni bawk. Tunah hian Mizoramah Hydro Generating Station 15 a awm mek a, a lian ber Serlui B hi 12 MW niin a bak hi 0.1 MW leh 3 MW te an ni tlangpui a, heng stations te hian 38.55 MW an siam thei tura chhut a nih laiin luitui a tam tawk loh avangin a siam theih zat chanve a siam pha meuh lo a ni. Solar Generating Stations 5 awm mekin a lian ber Vankal Solar Plant hian 20 MW siam thei a ni a, a bak hi 0.1 leh 2 MW siam thei te an ni.
