Larsap Dr Hari Babu Kambhampati chuan Mizoram Sawrkar chu kum 2047 a ‘Viksit Bharat’ – Ram Hmasawn ni tura hmalakna kawngah tihlawhtlingtu a nih ve ngei a beisei tih a sawi. He thu hi vawiina Mizoram Legislative Assembly vawi 9-na Budget Session ni hmasa bera House-a thu a sawina ah sawiin Larsap chuan State leh a chhunga chengte tana tha thlah lova sawrkar hmalakna avangin Mizoram chu state hmasawn ber leh chak ber zinga mi a la nih ngei a beisei a ti a, kum 2047-a Ram Hmasawn ni tura hmalakna kawngah ti hlawhtlingtu anih ve ngei a beisei tih a sawi. Larsap chuan Pu Lalduhoma kaihhruai Sorkar chuan inrelbawlna chhawng hrang hrangah Sorkar chak, langtlang leh rinawm, harsatnate sukiang tura rang taka hma la thin leh mawhphurhna la ngam Sorkar rinawm nih tlat an tum a ti a, Ei leh bara intodelhna, hmasawnna ruhrel pawimawh din leh thalaite thiamthil tihhmasawn kawngah te leh mahni kutkawiha eizawnna leh infiamna lama hmasawnna kawng zau zawk hawnsak te chu Sorkar hmathlir a ni a ti. Governor chuan Sum leh pai dinhmun siam tha turin kawng hrang hranga hmalak an mamawh a ti a, Sorkar sum fir taka hman te leh inrenchemna kalpuite, sumpai, tha leh hmanraw neih angte awmze nei leh hmangchang hre taka hman a pawimawh dawn a ti a, kum khat chhung sum leh pai dinhmun sawhngheh nana hman ani dawn a ti a, heng bakah hian a theihna apiangah tan la in sum lakluhna lam ngaihtuaha tihpun a ngai tih a sawi bawk.
Larsap chuan Mizoram chu mahni inrintawkna neia siam leh hmasawnna chu mi zawng zawng huapzo, nghet tak leh rorelna langtlang leh mipui telna hmuna chantir hi a ni tur a ni a ti a, Hemi lam hawi hian Mizoram Sorkar chuan hmasawnna tur thiltum pathum inzawmkhawm tlat, hmasawn zawnga than, hmasawnna ngelnghet siam leh Dan dik tak behchhana hmalakte chu inrualkhai taka kalpui a nih theih nan theihtawp chhuah a tum tih a sawi. Governor chuan Sorkar policy thar Hand Holding Policy‘Bana Kaih’ chuan kuthnathawktute leh mahni kutkawiha eizawng te nasa taka puiin hma lam a pan pui dawn a ti a, hmalakna hrang hrangte nena inmil leh rualkhai taka kalkawp tir tum tih sawiin Mizoram Sawrkarin a ngaih pawimawh zingah inkalpawhna kawng tha zawka siam a tel a ti a, kawlphetha siamchhuah leh intodelhna atan theihtawp a chhuah ani dawn tih a sawi bawk.
Larsap chuan Sorkar in kawlphetha siamchhuah leh intodelhna atan theihtawp a chhuah dawn a ti a, ni zung chakna leh hman nawn theih thil atanga kawlphetha siamchhuah pawh a dah pawimawh bik ang. Kawlphetha siamchhuah, hruipui hmanga pekchhuah leh a semchhuah kawngah fel fai zawka ruahmanna siam tum tih a sawi. Governor chuan Sorkar in chhawmdawl ngai zawk leh mi harsa zawkte chhawmdawlna leh an dinhmun chawikan chu a ngaipawimawh hle a ti a. State-a ruihhlo hmansual leh ruihhlo tawlhrukna te chu buaipui tham a ni tawh tak zet tih Sorkar chuan a hmu chiang tih sawiin Hetianga dan bawhchhiatna leh khawtlang nun ti chhetu ruihlo lengvak te ti rem turin Sorkar chuan thapui a chhuah dawn tih a sawi bawk.
