Vawiin khawvel chhandam tura Isua Krista khenbeh Ni (Good Friday) chu Mizoram pumah urhsun taka serh a ni.
Presbyterian Kohhran chuan inang tlangin thupui hrang hrang – ‘Isua chunga rorelna’, ‘Pathian Kalsan nun’ tih leh ‘A thihna chu kan thihna’ tih te an ngaithla ang a. Baptist kohhran chuan ‘Midang tidama mahni inti dam thei lo’ tih an ngaithla thung a, tualchhung kohhran ten mahni remchan angin hun an hmang bawk a ni. Caholic kohhran chuan Good Friday hi urhsun takin an hmang a. Mi tam tak chuan nizan atang khan Isua tawrhna tawmpui na’n chaw nghei a. Isua’n kalvari tlang pana kraws a putna leh a kawng zawh hriat reng na’n vawiin chhun khan Kraws kawngzawh an buatsaih bawk a ni.
Vawiin hi Good Friday a nih vangin Mizoram pumah dawr leh sumdawnna hmun te khar a ni a, sorkar pisa, Zirna In, Bank leh sorkar dawmdawi-ina damlo inentirna (OPD) te pawh khar a ni.
Good Friday hi district khawpui hrang hrang bakah khaw hrang hrangah urhsun taka hman a ni a. Inkhawm bakah Isua tawrhna leh khenbeh a nih chungchang hlate hmangin an lengkhawm bawk a. Kohhran thenkhatin ruai an theh lai-in a tam zawk chuan inkhawmna hun leh thingpui leh chhang inhona ni-ah an hmang a ni.
Good Friday leh Easter Sunday hi Krismas anga a ni ngai hman a ni lo va, a chhan chu Lal Isua thih hun lai hi Judate Kalhlen Kut hman lai vel Nisan ni 14 vel a ni a, chu chu March thla chawhnu lam, March 20 hnu, April 25 hma lam si, thla bial lai a ni a.
Chuvangin tun thleng hian Good Friday hun hi March 20 leh April 25 inkara thla bial lai, zirtawpni apiangin hman a ni ta zel a ni. Easter Sunday atanga chhuta ni 50-na chu Pentikos ni a ni. Thla bial lai chhuta a hun leh ni ruat thin a nih avangin heng ni pawimawh te hi a hun leh ni a danglam deuh hret hret thin a ni.
