Khawvel chhandam tura Isua Krista khenbeh a a awm champhaphak ‘Good Friday’ chu khawvel hmun dangte rualin Mizoramah urhsun taka hman a ni. Kohhran lian ber Presbyterian kohhran chuan vawiin hian inkhawm chhawng thum buatsaihin thusawitute’n chawhma lamah Isua Krista hi engtin nge kan tih tak ang le? tih chu an zir ho dawn a, chawhnu inkhawmah He mi hi Pathian Fapa a ni ngei mai tih thupui hmangin thu an sawi a. Zan inkhawmah chuan ‘Thlanah an zalh tih thupui hman a ni ang. Nizan, ‘Venpui Zan’-ah khan Synod Moderator Rev. R. Vanlalnghaka chuan Nursery Vengah hun a hman pui a, amah bakah hian Synod puipate chuan Aizawl khawpui kohhran ţhenkhata Lalpa Zanriah buatsaih turin an kal hlawm a, Venpui zanah hian Thupui inang Isua kan hralh ve em? tih chu zir ho a ni a, Presbyterian kohhran chuan Venpui zanah hian Isuan a zirtirte zanriah hnuhnung a kilpui hriatreng nan kohhran tinah zanriah sacrament an buatsaih a, Catholic kohhran chuan Isuan a zirtirte ke a silsak zan hriatreng nan, kohhran rawngbawltute ke Puithiamten silsakin mass an buatsaih bawk a ni.
Catholic Kohhran chuan vawiin hi Isua Krista tawrhna an tawrhpui tih lantir na’n Kraws kawngzawh an huaihawt a, Kraws chawimawina hun an hmang bawk. Synod thuchhuah tarlan danin Good Friday leh Venpui zan bakah hian Easter Sunday ah pawh Presbyerian kohhran tinah thupui inang zirho tur a ni a, Good Friday leh Easter Sunday hi Krismas anga a ni ngai hman a ni lo va, a chhan chu Lal Isua thih hun lai hi Judate Kalhlen Kut hman lai vel Nisan ni 14 vel a ni a, chu chu March thla chawhnu lam, March 20 hnu, April 25 hma lam si, thla bial lai a ni a.
Chuvangin tun thleng hian Good Friday hun hi March 20 leh April 25 inkara thla bial lai, Zirtawpni apiangin hman a ni ta zel a ni. Easter Sunday atanga chhuta ni 50-na chu Pentikos ni a ni. Thla bial lai chhuta a hun leh ni ruat thin a nih avangin heng ni pawimawh te hi a hun leh ni a danglam deuh hret hret thin a ni.
