Tukin khan Fire Service Week pualin Fire & Emergency Services Headquarters, Hunthar Vengah hun hman a ni a, kangmei thelh avanga nunna chan ta te hriatrengna hun hman a ni bawk. Vawiin bik hi Fire Service Day leh Martyrs Day puala hun hman anih angin Mizoram hmun hrang hranga Fire Station te chuan hemi pual hian hun an hmang a, Martar te sunna hunah hian kangthelhnaa leh duty kaihhnawihna thi te sun nan hun hman niin Martar te thlanah pangpar dah a ni bawk.
Kum tinin Fire Service Week hi India ram pumah April ni 14 atanga April ni 20 chhungin hman thin a ni a, Kumin atana thupui chu Kangmei lakah kan ram a him nan, i tangrual ang u” tih niin Fire Service Week pual hian Fire Station tin ten Hospital/Nursing Home pakhat leh School pakhat zel kangmei chhuah thulh a a him leh him loh endik na neih a ni dawn a, Fire Station zawng zawng ten an huamchin hnai vaiah Sikul thlan bik neiin Fire Safety Lecture & Mock Drill chu Sikul thuneitute nen inbe rawnin an buatsaih dawn a ni.
Kumin hian Ministry of Home Affairs hnuaia Director General- Fire Service, Civil Defence & Home Guard chuan Mizoram Fire & Emergency Service a thawk mi 5 (panga) te chu an hnathawh that avangin Bronze Disc leh Commendation Certificate dawng turin a rawn thlang a, Leading Firefighter J. Zoliana, Siaha Fire Station ami leh Firefighter H Lalthlamuana, Vairengte Fire Station ami leh Firefighter S. Lalremruata, Fire & Emergency Headquarters ami leh Firefighter L. David Vungzaliana, Khatla Fire Station ami bakah Driver Special Grade Thangchhuana, Kolasib Fire Station ami te chu lawmman dawng tura thlan an ni.
