Food Civil Supplies & Consumer Affairs Minister Pu B. Lalchhanzova’n ration card var hmangte tana buhfai KG-a Rs 30 ni tawh tur chuan rualkhai leh felfai zawka a kal phah ngei a rin thu a sawi.
He thu hi vawiina Targetted Public Distribution System (TPDS) hnuaia beneficiary-te chanvo leh an harsatna chhawk zangkhai dan chungchang inhrilhhriatna Vanapa Hall, Aizawla neih a hmanpui na ah sawiin Minister chuan mi tin te mahni zawn theuhah vantlang tana tangkaina nei thei vek an ni tih sawiin retailer-te chu sawrkarin an tanghma a ngai em em tih hria a, mipuite tana thahnemngai lehzual turin a fuih a. Ration card var hmangte tana buhfai KG-a Rs 30 ni tawh tur chuan Mizona thinlung chawk thovin, rualkhai leh felfai zawka an kal phah ngei a rin thu a sawi a, TPDS beneficiary-te thliar fel dan tur chungchangah pawh sawrkarin ngaihtuahna nasa tak a sen mek thu a tarlang bawk.
He hun, ‘Awareness Campaign on TPDS beneficiaries’ hi TPDS hnuaia beneficiary-te chanvo leh an harsatna chhawk zangkhai dan kawnga inhrilhhriatna a nih angin, Retailer leh Local Council-te puala buatsaih a ni a. Hei bakah hian NGO hrang hrang leh Community-based Organisations (CBOs) aiawh thahnem tak an tel bawk.
