Vawiin khan Central Training Institute, Sesawng-ah 11th Batch, Excise & Narcotics, Basic Training zote pualin ‘Passing Out Parade’ hun hman a ni a, Excise & Narcotics Minister Pu Lalnghinglova Hmar chuan khuallian niin hun a hmanpui a, Adviser to Chief Minister Pu Lalmuanpuia Punte-in khualzahawm niin a telpui bawk. Training hi September ni 1, 2025 atang khan neih tan a ni a; training chhuakte hi an vaiin mi 22 niin Sub-Inspector 12 leh Constable 10 an ni.
END Minister chuan thu sawiin Excise & Narcotics Department chu Chief Minister thlawpna hnuaiah department hmasawn berte zinga mi a nih thu a sawi a. Department-ah thawktu indaih lohna a nasat thin thu sawiin tun kum hnih kalta chhungin thawktu, mi thar 28 direct recruitment-a lak fel an nih tawh thu te, mi 41 lak belh lehna tur pawh buaipui mek a nih thu leh post thar pawh 16 siam a nih thu a sawi bawk. Heng bakah hian District thar 3-ah Excise Station hawn thar a nih thu sawiin, Inspector awpna hnuaia awm thin kha Lawngtlai nen Assistant Commissioner awpna hnuaia an awm tawh tur thu a sawi a. Tunah Sairang leh Bairabi-ah Excise Station thar hawn phalna an nei leh tawh thu a sawi bawk.
END Minister chuan Excise & Narcotics Deaprtment-in tun hnaiah lirthei thar 21 an dawn thu sawi bawkin, ruihhlo dona tura sawrkar inbuatsaihna vek a nih thu a sawi a. Training chhuak tharte pawh theihtawp chhuah tura chahin ‘Indo kan ni a, kan do lamah kan tan a thiang lo’, tiin tumah ruihhloa inhnamhnawih lo turin a chah bawk.
