Kumina Lok Sabha inthlanpui lo awm tura inpuahchahna kal mekah inthlan nana hman tur EVM leh VVPAT chu vawiin khan District hrang hrangah Randomisation vawi khatna neih a ni.
Aizawl ah chuan DC Conference Hall ah DC Nazuk Kumar hoa neih a ni a, Inthlanna felfai tak a awm theih nan EVM randomization hi neih thin a ni a. EVM te chu khawi constituency leh khawi polling station ah nge dah an nih dawn tih tu mahin an hre lawk lo a. Computer kaltlangin serial number hmangin, EVM khawlte hi khawia hman tur nge tih thlan thin a ni.
Lunglei ah chuan District Election Officer leh bawrhsap nibawk Pi Ramdinliani chuan a hman pui a, Lunglei district chhungah hian Pink Polling station 24 tiamin Polling Station 176 a awm, Assembly bial 6 a awm bawk.
Champhai ah chuan NIC Conference Hall, Keifangtlang, Champhaiah neih a ni a, First Randomization-ah hian Champhai District-a Parliamentary Segment pathuma EVM leh VVPAT hman turte chu Computer hmanga thlan chhuaha semrual a ni.
Serchhipah chuan District Election Office ah Inthlanpui lo awm tur atan Electronic Voting Machine Randomization chu Addl.DC Pu James Lalnithanga hova neih a ni a, EVM Randomization thawhkhatna ah hian election official dang te bakah Political Party hrang hrang aiawhte leh chanchinbumite an tel a ni.
Lawngtlai ah chuan NIC Conference Room-ah District Election Officer Pu Cheemala Siva Gopal Reddy hovin neih a ni a, Lawngtlai District chhunga polling station 181-a inthlan buaipui tur, Presiding Officer, Assistant Presiding Officer leh Polling Officer turte chu thlavenga awm tur chhut telin khawl hmanga thliar fel niin, an kalna tur assembly constituency tih fel nghal a ni a. Team inkawp tur leh an kalna tur polling station te chu 2nd leh 3rd randomisation-ah khawl hmang veka tih fel leh a ni ang.
Mamit ah chuan DC Pu V.L. Remliana hoa hman niin DC chuan ECI ruahmanna leh duhdan chu a rintlakin a felfai thu a sawi a, EVM khawl hman turte hi a hman tlak leh tlak loh endik leh vek a ni ang a, khawl hmanga thliarfelna 2nd Randomization hi neih leh tur niin, mahni duh anga siksawi leh khawih chingpen theih a nih loh thu a sawi.
