Power & Electricity (P&E) department changtu Minister Pu F. Rodingliana chuan thla hmasa ni 16-a lak angin an department in kawlphetha an leina ba chu cheng vbc 144 nuai 25 sang 8 za 7 sawmruk a nih thu leh, tun thla chhunga ba te hi rulh vek tum a nih thu a sawi. He thu hi vawiin Assembly thutkhawmah zawhna chhangin Minister hian a sawi a. Kawlphetha leina ba chu generating company-ah cheng vbc 127 nuai 8 sang 9 za 4 sawmkua pathum, transmission company-ah cheng vbc 16 nuai 67 sing 1 sang 6 za sawmsarih pathum leh North East Load Dispatch Centre-ah cheng nuai 49 sing 8 sang 3 sawmkua leh pali te a nih thu a sawi a. Electric bill ba chungchang chu an policy-ah pawh an dah thu leh, Chief Minister in March thla chhungin power leina ba chu rulh vek an tum tih a hriattir thu leh lawmawm a tih thu a sawi a ni.
P&E Minister chuan corporate lam an hawi tan thu sawiin tuna in se zawl chhuah ngawt theih a nih loh thu a sawi a. An hmalakna kawng tinrengah intodelh phawt turin ruahmanna an siam thu leh, an hmalakna kawng tinreng chu corporate lam hawi a nih thu a sawi a ni.Minister chuan Mizoram chhim lam thim zing tih sawi an hriat chu an in zawh kual thu sawiin, a hrui mai bakah a disc a lo hlui tawh thu a sawi a. Ruah sur loha current kaltlang chu ruah a sur chuan a disc khi ah current a lo leak thei tih a sawi a. Hei hi sum awm ang angin a thlakna an ngaihtuah thu leh, tunah hian an thlak mek thu a sawi a. Thal chhunga an zawh hman mai theih thu Minister chuan a sawi a ni.
Minister chuan Lungleng khaw bula Tlawng Hydro Project MW 54 pechhuak thei turah hma lak a nih tawh thu a sawi bawk a. Tlawng HEP chu a tirah CWC ruahman danin MW 54 pechhuak thei tur a nih thu a sawi a. A hnuah CWC vekin MW 120 turin hma thar a la leh tih sawiin he lui tho hi a hmun ngaiah sorkar thar hmalaknain MW 24 pechhuak turin ruahman a ni a ti.
