Doordarshan Kendra (DDK) Aizawl Director (News) Pu Nampibou Marinmai chuan nimin khan Sawrkar laipui hmalakna Ek Ped Maa Ke Naam pualin Indian Institute of Mass Communication Campus MZU ah Thing ṭiak a phun. DDK News Director hian Mission LiFE (Lifestyle for Environment) programme hnuaia hmalâkna pakhat atân ‘Ek Ped Maa Ke Naam – Plant 4 Mother’ campaign pualin Thing ṭiak hi a phun a, Mizoram State Tree – Herhse ṭiak a phun a ni. He hunah hian IIMC Aizawl-a thawktu leh zirlai naupang ten an tawiawm a, Director chuan Ek Ped Maa Ke Naam chu sawrkar laipui program pawimawh tak ani tih sawiin ramchhung hmun hrang hranga thing ṭiak phun chuan zirlaite leh mipuite ah ramngaw venhim leh ram chereu zel tur ven kawngah rilru thar put tir se a duh tih a sawi.
Director chuan thing ṭiak phun zawha IIMC zirlaite nen an inkawmna ah an hmasawnna tur kawng hrang hrang hrilh in huai taka awma mahni hmaa harsatna awm chu peh hel mai loa hmachhawn ngam turin a chah a, Mizote chu midang tana inpe leh nelawm tak annih avangin midang pawh tama, zirna in pawn lama an tana tangkai tur ngaihtuah thiam turin a chah a ni. Plant 4 Mother hnuaiah hian thing phun rûnpui hi State hrang hrangah kalpui mêk niin state sawrkar hmalakna in hmun hrang hrangah thing hi phun tawh a ni a, ruahman dan chuan Doordarshan, All India Radio leh PIB ah te he hmalakna pual hian thing ṭiak phun chhunzawm a ni dawn a ni.
Ek Ped Maa Ke Naam – Plant 4 Mother’ campaign hi Prime Minister Pu Narendra Modi-a’n kumin June ni 5, World Environment Day khân a hawng a, he campaign-ah hian India ram mipui zawng zawngte chu mahni nute puala thing tiak pakhat theuh tal phun turin Prime Minister hian a sâwm a ni. Mission LiFE programme hi ‘Environment’ humhalh leh humhim pawimawhzia inzirtirna leh chumi kawnga mi tinin ke kan pên theih dân tur inkawh hmuhna a ni a, mimal leh khawtlâng anga kan nitin nunphung leh nun dânte, kan chhehvêl leilung nena inhne rem tura inthlâk danglam tura inzirtirna leh inkaihhruaina a ni.
