Ek Ped Maa Ke Naam – Plant 4 Mother’ campaign hnuaia thing phun rûnpui State hrang hranga kalpui mêkah vawiin khan Aizawl-a Prasar Bharati hnuaia peng hrang hrang ten All India Radio Transmitter hmunah thing tiak an phun. Ramngaw humhalh leh humhim pawimawhzia inzirtirna leh hma la tura mi tin ten ke an pên theih dân tur inkawh hmuhna atan thing tiak hi Aizawl Chawnpui vengah All India Radio Transmitter hmunah thing tiak hi phun a ni a, All India Radio Director leh Cluster Head Pu DR Lalropuia leh Doordarshan Kendra (DDK) Aizawl Director (News) Pu Nampibou Marinmai chuan Ek Ped Maa Ke Naam pual hian Thing ṭiak an phun a ni.
He hunah hian All India Radio, PIB leh CBC thawktu hrang hrangte an tel a, Akashvani Aizawl atangin Regional News Asst Director Pu Gin Gangte, Head of Program Pu Samuel Z. Hrangate, Program Executive Pi Lalrammawii ten an phun a, PIB Media and Communication Officer Rajeev Lourembam leh CBC thawktute pawhin thingtiak hi an phun bawk a ni.
Plant 4 Mother hnuaiah hian thing phun rûnpui hi State hrang hrangah kalpui mêk niin state sawrkar hmalakna in hmun hrang hrangah thing hi phun tawh a ni a, Ek Ped Maa Ke Naam – Plant 4 Mother’ campaign hi Prime Minister Pu Narendra Modi-a’n kumin June ni 5, World Environment Day khân a hawng a, he campaign-ah hian India ram mipui zawng zawngte chu mahni nute puala thing tiak pakhat theuh tal phun turin Prime Minister hian a sâwm a ni.
