School Education Minister Dr Vanlalthlana’n Mizo zirlaite chu India state dang leh ram danga zirlaite aia an hnufual bik loh nan zirtirtute intuai hriam thar a ngaih thu a sawi.
Baptist Centre, Falkland, Aizawla Mizoram Middle School Teachers Association(MSTA) General Conference buatsaih a hmanpui na ah sawiin Dr Vanlalthlana chuan zirlai zingah Middle school zirlaite chu uluk leh zuala enkawl an ngaih hun lai a nih thu a sawi a, an rilru nasa taka a danglam thin avangin zirtirtute chu an hringnun kaihruaitu an nih a ngai a ti a, A tha lama ngaihtuahna an sen thiam nan an dil chhutna leh an suangtuahna hman an thiam tharna chu kaihhruai a pawimawh tih sawiin Taksa lamah puitlin lam an pan chhoh avangin hormonal change leh mood swing an nei chho nasa a, duat taka an enkawl thiam an ngai tih a sawi.
Minister chuan tunlai thiamna smartphone leh social media hman dan pawh uluk taka hrilh an ngai tih sawiin zirtirtute chu intuaithar reng an ngai a ti a, zirtirtu ringawt an ni lo tih sawiin zirlaite nun kaihruaitu pawimawh tak an ni tih inhre reng turin a chah a ni.
