Akashvani palai in a kawmnaah Pu B. Lalrinhlua chuan, Mizoram dinhmun tha tur chuan thalaite’n thu an awih a ngai, a ti a. Pathian thu bakah ruihtheihthil leh an nun uluk a ngai tih sawiin, kum upa, hna thawk thei tawh lo te kan ngaihsak a ngai a, an hamthatna, rei tak an dam theihna turin mipui leh sorkarin a ngaihtuah a tul a. Khawvel ram hrang hrangte buaina ang zirchiang lova kan kal mawp mawp chuan Mizote hma hun tur chu kum upa an in pel suau suau ang a, thalai hnathawk thei an tlem anga Ageing population a pung ang a. Thuawihna nun nen erawh thalaiten hun an hman chuan dinhmun tha takah Mizote chu an awm thei a ni, a ti.
Aizawl District bika pian leh thih dan Economics & Statistics Dept. Civil Registration System-in a chhinchhiah danin kum 2022 chhunga mipa piang zat chu 4817 a ni a, hmeichhia 4790 an piang thung. Kum 2023 chhungin mipa piang zat chu 4788 a ni a, hmeichhia 4540 an piang a. Kum 2022 leh 2023 a mipa piang kiamna zat chu 29 a ni a, hmeichhia piang kiamna zat chu 250 a ni. A pumpuia khaikhin chuan naupiang kiamna zat chu 279 a ni. Kum 2022 khan mipa thi zat hi 2661, hmeichhia 1361 an ni a, kum 2023-ah mipa thi zat chu 2943 a ni a, hmeichhia 1295 an thi . Mipa hi 168 in an kiam a, hmeichhia 66 in an kiam thung a ni. Mipa leh hmeichhe thi zat kiamna hi 234 a ni.
Kum 2024 January atanga April thla thlengin mipa 1475 an piang a, hmeichhia 1406 an piang thung. Kumin January atanga April thla thleng khan mipa thi zat hi 842 a ni a, hmeichhe thi zat hi 436 a ni a, a vaiin mitthi zat hi 1278 an ni .
Tun dinhmunah Economics & Statistics Dept hnuaiah hian Branch leh Unit 8 a awm a. Chung zinga pakhat chu Civil Registration System – piang leh thi bakah population chungchang chhinchhiahna a ni
