Vawiin khan Mizoram Pollution Control Board (MPCB) leh Hulladek Recycling Company-te buatsaihin E-waste Management chungchângah MINECO-a Taxation Department Auditorium-ah Awareness Workshop buatsaih a ni a. Pu Liankima Lailung (IFS Rtd.), MPCB Chairman chuan khuallian niin he hun hi a hmanpui. Khuallian chuan thu sawiin Electronic bungraw chhia (e-waste)-te hi phalna neite (E-waste Collector) hnenah chauh kan thehthang tur a ni a, phalna pe theitu chu State Pollution Control Board-te hi an ni a, Collector-te hian store/stock chiah an ti thei bawk a, an thiat darhin an phelh darh thiang lo a ni. E-waste aia hlauhawm bawlhhlawh dang hi a awm lo tih theih a ni a, chuvangin a hranin dân pawh siam a ni hial reng a. Khua leh tui tha chuan kan tih âwm tak dân chu thu awih takin kan zâwm mai tur a ni tiin vawiina kal khâwm zawng zawngte chu ke pên hmasatu ni theuh turin a sâwm nghal bawk a ni.
He Workshop-ah hian Hulladek Recycling Company leh MPCB atangin Power-point presentation thlîr ho-a ngaihthlâk a ni a, E-waste Management Rules pawimawhna leh siam a nih chhan te, E-waste thehthang kawnga mipuite leh a hmangtute mawhphurhna leh E-waste tih tlêm dân tur leh tih tlêm pawimawhna te zir ho a ni. Vawiin Workshop-in a tum ber chu dân zâwmin engtin nge kan electronic bungraw chhiate kan thehthang ang tih a ni ber a, bawlhhlawh dang zîngah kan paih ve mai thiang lo a, a chhan chu chhiatna nasa zâwk thlen thei thilte a awm avâng leh kan environment vawn thianghlim zêl nân te, company lama thawn lêt-a recycle theih thilte a nih thin avângin E-waste khawn khâwm tura SPCB-in phalna a pêkte kutah chauh hian kan pe thin tur a ni a.
Hulladek Recycling Company-te hi kan electronic bungraw chhiate khawn khâwma dân dik taka a tûl anga thehthangtute an ni a, anni hnênah hian eng lai pawhin kan E-waste-te kan pe-in kan tiral thei reng a ni. He Workshop-a kal khâwmte hian E-waste titlêm tur leh dân dik taka thehthang zêl tawh turin thu an tiam (pledge taking) nghal vek a ni. He hunah hian Sawrkâr department hrang hranga hotute leh Aizawl khawpui chhûnga zirlaite, electronic bungraw kaihhnawih zuar leh repair thinte an kal khâwm a ni.
