Vawiin khan Dr. Lorrain Lalpekliana Chinzah, Adviser to Chief Minister leh Lawngtlai East Bialtu MLA nibawk chuan District Hospital, Lairam Christian Medical Centre & Health (LCMC&H), Christian Hospital Lawngtlai(CHL), Lairam Motherless Home, Lairam Rescue Centre (LRC), District Jail, Police Station leh Traffic Police, Lawngtlai te hnenah Krismas puala thilpek hlanna a nei. District Hospital, Lairam Christian Medical Centre & Health (LCMC&H) leh Christian Hospital Lawngtlai – a tlawhnaah hian thusawina neiin Dr. Lorrain Lalpekliana Chinzah chuan damlo an enkawl kawngah hmangaihna leh lainatna nen enkawl thin turin a chah a. Tihdam rawngbawlna hna thawk an nih ang a theihtawp chhuah zel tura fuihin, midangte tana malsawmna ni zel turin duhsakna a hlan a ni.
Dr. Lorrain Lalpekliana Chinzah chuan Lairam Motherless Home- a thawkte dinhmun pawimawhna sawiin, nu leh pa nei lo, fahrah enkawltu an ni a, an hnathawh a ropuiin fak an phu em em a ni, a ti. Ruihhlo laka fihlim tumte enkawltu Lairam Rescue Centre- a thawktute chu an hnathawh rah atak a hmuh a nih mek thu tarlangin, ram leh hnam tichhetu ber ruihhlo do kawnga thawh hlawk ber pakhat an nih thu a sawi a.Lairam tana Lairam Rescue Centre hnathawh hi fak a phu hle tih tarlangin, Adviser to Chief Minister chuan ngawlvei ten nunkawng dik an zawhna tura theihtawp an chhuah thin chu mipuiten an hriatpui tih sawiin, theihtawp chhuah zel turin a fuih a ni. District Jail, Lawngtlai a thawktute chu Dan ang tak a Jail tang an enkawl thin turin a chah a. Dan leh thupek kenkawh kawnga Police leh Traffic Police- te pawimawhna tarlangin, MLA chuan an hnathawh a fakawm tak zet a ti a. Krismas leh Kum thar hunpui lo thleng turah mipuiten ralmuang leh zalen taka hun an hman theihna tura theihtawp chhuah turin a chah nghal bawk.
Dr. Lorrain Lalpekliana Chinzah chuan District Hospital, Lairam Christian Medical Centre & Health (LCMC&H), Christian Hospital Lawngtlai ( CHL) , Lairam Motherless Home, Lairam Rescue Centre (LRC), District Jail, Police Station leh Traffic Police, Lawngtlai ten Krismas leh Kum thar hlim leh lawm taka an hmanna turin pawisa fai a hlan a, Lairam Motherless Home- ah hian Oxygen Concentrator ( Double Use) a hlan tel bawk.
