Disaster Management & Rehabilitation department Secretary Pi K. Lalrinzuali, chuan Cyclone Remal lo thleng turah hian District Disaster Management Authority hrang hrang te hmalaknaa theihtawp chhuaha lo inralrin ni mah se thli leh ruah nasa lutuk avangin chhiatna tam tak a thleng a ti a.
Electric line hrang hrang a chhiat nasat avangin inbiakpawhna thlengin harsatna a awm tih sawiin chhiatna chungchang report an pekchhuah tur pawh an duh anga ranga an inpek tawn theih loh thu leh, hei hian harsatna hrang hrang a thlen thu a sawi a. Sorkar department hrang hrang leh chhiatna thlenna hmuna khawtlang mipuite tanrualna chu lawmawm a tih thu a sawi a ni.
Pi K. Lalrinzuali chuan vawiin tlai thlenga department chhinchhiah danin Mizoram chhunga khaw 167-ah chhiatna a thleng a. Aizawl district-ah hmun 59, Lunglei district-ah hmun 30, Siaha district-ah hmun 9, Champhai district-ah hmun 12, Kolasib district-ah hmun 8, Serchhip district-ah hmun 11, Lawngtlai district-ah hmun 8, Mamit district-ah hmun 11, Saitual district-ah hmun 10, Khawzawl district-ah hmun 5 leh Hnahthial district-ah hmun 4-ah te chhiatna hrang hrang a thlen thu a sawi a ni.
