Mizoram sawrkara Disaster Management & Rehabilitation (DM&R) Department Minister Prof. Lalnilawma chuan tukin zingkar khan ATL (Aizawl-Thenzawl-Lunglei) Road kawngpui, Lunglei Zotlang kham phei, Tourist Lodge peng leh Chawngbawla Point inkara lei che avanga kawng chhak lam aṭanga lei tawlh, hun rei tak kut thlak ngam lohva awm tawh chu a hmunah tlawhin, Lunglei Municipal Council (LMC) hotute leh District Disaster Management Authority (DDMA) ai awhte nen hma lak dan tur an thlir ho.
DM&R Minister hova Lunglei Zotlanga lei tawlhna hmun ennaah hian DM&R official-te bakah, LMC Chairman Pu Lalzuithanga, Vice Chairman Pu K. Lalrinawma, Chief Executive Officer Pu Donny Lalruatsanga leh Lunglei Sub-Deputy Commissioner Pi Lalhlimpuii Pachuau te an tel a. DM&R Minister chuan he lai kawngpui hi Mizoram chhim lam tana kawngpui pawimawh tak a nih avangin kawngpuiin a tuar lohna tur leh chhiatna nasa zawk a thlen loh nana hma lak dan tur ruahman a, bawhzui vat ṭul a tih thu a sawi a. Tun dinhmuna mipui mamawhna thlir chung leh harsatna hnaivai awm thei veng chunga hma lak bakah, khuarei thlira daih rei zawk tura ruahmanna lian zawk siam ṭha a tih thu a sawi.
He hunah hian he lai hmun chhan nana hma lakna hrang hrang awm tawhte sawi ho niin, lei hi a chet belh zel loh nan leh fur lo thleng turah harsatna lian zawk a thlen belh loh nan chak zawka hma lak dan tur zir chian a, ruahmanna thar siam ṭha tih a ni a. A chhak lamah tui lut reng a awm loh nan a hma lamin zir chian a, tuiluankawr (drain) siam dan ngaihtuah ni se, tih a ni a. He lai kawng hi kawngpui pawimawh tak a nih angin kawng leh lirthei tlante tana him tura leivung then fai leh kawng tihzauh dan tur kawng zawn ni se, a bawhzui dan tur chu LMC, DDMA leh a kaihhnawih department hrang hrangte nen la sawi ho ni se, tih a ni.
