Vawiin khan Mizoram Legislative Assembly Deputy Speaker Pu Lalfamkima chuan Assam state-a Silchar hmuna Mizoram Sawrkar hmunhma – Mizoram House, Mizoram State Transport Terminal leh Mizoram Public Works Department (MPWD)-in hmunhma pathum an neih te a tlawh.
Deputy Speaker Pu Lalfamkima chuan Mizoram Sawrkarin Silchar-a hmunhma a neihte dinhmun hre chiang tura tlawh a nih thu sawiin, he’ng hmunhmate hi humhalh a, chei ṭhat bakah, mipuite chhawr theih tura tihchangtlun lehzual a ṭul thu a sawi a. MPWD hmunhma pakhat Circuit Road-a awm chu, a luahtu chhungkaw hnihte an chhuah duh loh avanga harsatna awm chu a ṭul anga hma lakna kalpui a nih tur thu a sawi bawk.
Deputy Speaker Pu Lalfamkima hi Mizoram House, Silchar-a Assistant Resident Commissioner Pi Hasina Begum leh Silchar-a Transport leh PWD Department-a thawkte’n an lo dawngsawng a ni.
