Vawiin khan Assembly Dy Speaker Pu Lalfamkima chuan NH-54/6 huam chhunga RTP farm leh Sethawn inkar leh Kawnpui Quarry bula Kawng siam mek a tlawh a, Contractor chu chak zawka hna thawk turin a chah. Assembly Dy Speaker Pu Lalfamkima chuan, Mizoram sorkar in Inkalpawhna Kawngpui a ngaih pawimawh thu sawiin, Aizawl panna Kawngpui hun reitak chhung lirthei kal velah harsatna a awm chu pawi a tih thu a sawi a. Hna enkawltu NHIDCL leh an hnuaia Contractor te chu mipuite mamawhna hria a, hun tiam chhungin an hna thawk zo ngei turin a chah.
National Highway 54/6 huam chhung, Kolasib leh Kawnpui inkara RTP farm leh Sethawn khaw inkar leh Kawnpui Quarry bula Kawng chhe zual zual lai; ruah a sur changa lirthei tànna thin chu NHIDCL hnuaiah Contractor Pu C. Lalhluna, Aizawl chuan a thawk mek a, a hna RTP farm leh Sethawn inkar leh Kawnpui Quarry bul, kawng chhe zual lai hi meter 200 ve ve Dry Lean Concrete (DLC) leh Pavement Quality Concrete (PQR) in an thawk mek. DLC hi Inches 6 a chhah niin, hemi chungah hian PQR (Inches 10 a chhah) in an chhung leh a, a zau zawng (width) hi meter 7 tur niin, a chanve (side lehlam) 3.5 meters chhun mek ani a, he hna hi thla thar July ni 12 ah zo hman tur in theih tawp chhuah mek ani. Hemi hnu ah side leh lam 3.5 meters hi thawh chhunzawm ani ang.
Kawng chhia ah hian lirthei veivak a tangkhan loh nan leh hnathawh a buai loh nan chhun lam ah Contractor in traffic duty a ruahman a, zan lamah Kolasib Traffic Police leh Kawnpui Police an in duty chhawk anga, Thingdawl YMA in an puibawm thin ang. Dy Speaker hi NHIDCL hotute; PWD SDO Er. Lianhmingthanga; Kolasib District MJA hruaitute leh Contractor aiawh ten an tawiawm.
