Vawiin khan Kalvari home TNT khuangpuilam, Kolasib ah Padma shri Dr. Sangthankima, Chairman TNT, Padma Shri Award lawmpuina hun hman a ni a, Pu Lalfamkima Bialtu MLA leh Dy. Speaker ni bawkin he hun hi a hmanpui.
Padma Shri Award lawmna hun Pu Zonunsanga President, Kolasib branch TNT kaihhruaiah hian Pu Lalfamkima Dy. Speaker chuan thu sawiin, Pathian atanga chhuak hmangaihna dik, mahni mihringpui te hmangaihna nen Pu Sangthankima hian hma a la a, chuvangin a hmalakna hi Pathianin mal a sawm ani tih hmuhtheih in a lang a ni, a ti a. Hei bakah hian Mizoram ah hian mipa aiin hmeichhia kan tam a, mipa ten tan kan lak loh chuan kan hmabak hi a eng lo a, engvangin nge hmeichhia aiin mipa te hi an nun a tawi bik tih hi ngaihtuah tham a tling a ni, a ti. TNT enkawl hna chu mi aia thiamna chungchuang leh mi bik nihna nei hran lo mahse mahni mihringpui enkawlna kawnga tluang tak leh hlawhtling taka a kal thei chu thawktute Pathian a an innghah tlat vang a ni, a ti bawk.
He hunah hian Padma Shri Dr Sangthankima pawhin thu sawiin, TNT Muanna veng, Aizawlah mi 1810 awmin, khawvela Home lian ber an nih thu a sawi a. Hei bakah hian Padma Shri Award dawn hi a phu lo leh a dil ngai loh ani tih sawiin, Pathian malsawmna avangin Award 20 chuang a dawng tawh tih a sawi bawk. Mother teressa international award, khawvel award 2 leh National Award 4 a dawng tawh a, mi tam takin Padma Shri Award an dawn chhan ngaihtuah chuan a ni chu vohbik enkawl te, ruihhlo ngai enkawl te, rualbanlo enkawl te a nih na chu a danglamna a ni, a ti a. Hetiang chawimawina a dawn hi anmahni vang liau liau a ni, a ti bawk.
TNT hian Mizoram chhung Champhai, Lunglei, Muanna veng, Aizawl leh Kolasib ah te Home neiin,Kolasib TNT hi kum 1992 a din a ni. Tahan, Myanmar ah centre an nei bawk a, Mizoram chhung Home hrang hranga mi te pawhin he hun hi hmanpuiin, Pu K. Lalrinliana Ex. Minister pawhin a hmanpui bawk.
