Tukin khan Mizoram Legislative Assembly Deputy Speaker, Pu Lalfamkima chuan Kolasib khawpui, Electric venga Fire station leh PHE compound bul hnaia kangthelh motor ten kawngpui zim leh kawi ulh lutuk avanga rikrum thil thua tlan chhuah dawn a harsatna an tawh thinna hmun chu a enfiah.
Electric venga Fire Station hi Kolasiba Fire Station awm chhun niin, helai hmun atanga Hmar veng leh veng dang pawh chhohna kawngpui hi a zimin a kual em avangin Kangthelh motor te tan vawi khata kual chhuah mai theih a ni thin lova. He thil hi hun rei tawh tak atanga Fire Station lam hotute leh a veng chhung mipuite leh a chhehvela sawrkar office te pawn an ngaih pawimawh a ni a. Tukin Zing khan Deputy Speaker hian a hmunah enfiahin harsatna tawk lova kangthelh motor a tlan chhuah theih dan tur Kolasiba sawrkar Department hotute leh khawtlang hruaitu kalkhawmte a sawipui a.
He an ruahmanna ahhian kawngpui awm sa tlem a siam danglam leh Department ram thenkhat lak hek ngai te a awm avangin PWD, PHE, P&E leh Police hotu lian te lamah thlen nise tia sawiho a ni a. Deputy Speaker hian tukina he hmun tlawhna a tel ve Kolasib DC, Pu Robert C Lalhmangaiha, SP, Pu David H Lalthangliana, Kolasib a PWD leh PHE EE te leh khawtlang hruaitu kalkhawmte hnenah chuan a rang lama ziak a thlen a hma la tura hrilhin amah ngeiin bawhzui a tum thu a sawi bawk.
Tukina Deputy Speaker leh Bialtu MLA nibawkin Kolasib Electric venga Kangthelh motor tlanchhuahna hmun a ennaah hian a chunga tarlan tak angin Kolasib DC,SP, PWD,P&E leh PHE EE leh khawtlang hruaitute an tel a ni.
