Vawiin khan Govt. Kolasib ‘College Freshers’ Social & Graduation Day, 2024’ chu Main Hall, Govt. Kolasib College ah hman a ni a. Pu Lalfamkima, Dy. Speaker, Mizoram Legislative Assembly leh MLA Kolasib A/C nibawk chuan he hun hi a hmanpui. Pu Lalfamkima chuan kalkhawm te hnenah lawmthu sawiin Govt. Kolasib College ten a result tha tak an neih chu a lawmpui thu a sawi a. Zirlai pass te hnena lawmpuina sawiin an kalzelna turah duhsakna a hlan a, hetiang a zirlai hlawhtling te tana chawimawina hun an buatsaih thei chu lawmawm a tih thu a sawi. Zirlaite chu fuih in, zirna ah graduate chu kawtchhuah a ni thu leh miten mipuitling ah an ngai tawh thu sawiin taima taka an zirna chhunzawm zel turin duhsakna a hlan a. Thiamna tak tak neih chu a pawimawh hle a ni tiin, mihring kan lo pung zel a, hna a van tawh avangin quality tha neih a pawimawh a ni, a ti a, tihtakzeta zir tute tan leh a bei tak tak tute tan erawh chuan hna hi a awm zel a ni a ti.
Dy. Speaker chuan zirlai rawn lut thar te fuih zuiin, College chu zirna in zalen tak a awm theihna hmun angin lang mahse an zirlai ah rilru leh tihtakzet a pe turin a chah bawk. Pu Lalfamkima chuan ruihhlo chungchang sawi zuiin, zirlaite tan leh thalai te tana min tihbuaitu ber a ni tawh a ti a, ruihhlo laka inthiar fihlim turin a chah . Mizoram-ah gender ratio a inthlauh tawh lutuk avangin a bikin mipaten ruihhlo laka inthiar fihlim zual a pawimawh thu a sawi bawk.Vawiin programme hi Pu Laltanpuia Rengsi, Principal Govt. Kolasib College chuan inlawmna thu sawi a, Graduate thar zirlai aiawh te hnen atangin thusawi ngaithlak a ni a.
BCA, Arts, Science leh Mathematics department te hnen ah lawmpuina memento semna hun hman a ni a, Zai leh lam chi hrang ngaithlak a ni bawk. Pu Christopher JZ Lowlor, Vice Principal in kalkhawmte hnenah lawmthu sawina hun a hman zawhin hun tihtawp a ni. Govt. Kolasib College a hian Teaching Staff mi 58 awm in, non-teaching staff mi 15 an awm mek a, tun kum result chhuak ah zirlai 191 exam hmachhawnin mi 97 in an pass a. Distinction ah mi 3, First Division ah mi 90 leh Second division ah mi 4 pass an nei a ni.
