Health and Family Welfare hnuai a State Vector Borne Diseases Control Programme (SVDBCP) hotute hnen atanga thu dawn danin kumin July thla khan Aizawl Tuikual veng ami chu Dengue vangin a thi a. Kum 2022 khan mi 5 an thi a, nikum khan 2 an thi bawk. Kuminah hian Dengue hri kai ni a inringhlel mi 3,186 sample endik zinga 228 chuan he natna hi an vei tih hmuhchhuah a ni a. An zinga mi 126 te hi Aizawl district ami an ni a, Lunglei district-ah Dengue vei hmuhchhuah 94 an awm bawk a, district dangah chuan awm ve bawk mah se, Aizawl leh Lunglei district hi Dengue hri kai hmuhchhuah tam berna a ni. Kum 2013 kha Mizorama Dengue natna kai hmuhchhuah hmasak ber kum a ni a. Kum 2022 kha hri kai hmuhchhuah tam kum leh nunna chan pawh an tam ber kum a ni a. Nikumah pawh khan Dengue hri vei hi an tam tho a ni.
Hetih lai hian thosi seh avanga natna kai darh chi tho Chikungunya avangin Mizoramah thi an la awm lova, kumin chhungin he hri kai inringhlel mi 94 sample lak zingah hri kai hmuhchhuah an awm lo bawk. Hri kai rinhlelhte hi Lunglei district ami vek an ni. Kum 2018 khan Chikungunya hri kai Mizoramah a hmasa ber atan hmuhchhuah a ni a, mi 10-in he hri hi an kai a. Kum 2020 khan Chikungunya hri kai mi 67 hmuhchhuah a ni a, kum 2022 khan mi 53 hmuhchhuah leh a ni. Lunglei district-ah he natna hri kai hmuhchhuah a tam ber a ni.
SVDBCP hotuten sawi dan in nikum khan malaria hri vei hmuhchhuah a tam hle a, mi 18,005 in sikserh natna hi vei-in an zinga 13-in an thihpui. Kum 2022 nena khaikinin nikumah sikserh natna vei za zela 76 chuangin a pung a ni.
