MLA Pu Rasik Mohan Chakma, Chakma Autonomous District Council CEM ni bawk chuan dan ang thlapin MLA leh CEM a nih kawp theih thu leh, hlawh pawh a lak kawp theih thu a sawi.
He thu hi vawiina Aizawl Press Club-a chanchinbumite a kawmnaah Pu Rasik Mohan Chakma hian a sawi a. Larsap hnena ZPM MDC Pu DD Chakma in a hekna chu sawifiah tul a tih thu sawiin 6th Schedule hnuaia Autonomous District Council MDC leh CEM post te chu India ram danpui hnuaia ‘office of profit’ a nih loh avangin MLA nen a nih kawpin ‘office of profit’ dan a bawhchhiat loh thu a sawi a. CEM hna a thawh avangin CEM hlawh a lak thian thu leh MLA hna a thawh avang pawhin hlawh pawh a lak thian thu a sawi a, thawhhlawh chu la tur reng a nih thu a sawi a ni.
Pu Rasik Mohan Chakma chuan Hachhek bialtu MLA, ZPM Party in a fapa firm in sorkara contract a thawh avanga ‘office of profit’ dan bawhchhiaa an puhna pawh dan bawhchhia a ni lo tih ECI in an nemngheh tawh thu a sawi a. Dan hriat loh avangin mi dik te hmuh diklohin an awm thin tih sawiin mipui leh party pawhin dan an hriat loh avangin mi chungah ngaihdan dik lo neih palh theih a nih thu a sawi a ni.
