Council of Scientific & Industrial Research – Central Institute of Mining & Fuel Research (CSIR-CIMR) leh MACCAFERRI Environmental Solution Pvt. Ltd. atanga lokal mithiamte, Aizawl District Disaster Management Authority (ADDMA) leh Sawrkar department hrang hrang aiawhte’n nimin lama Pukpui, Lengpui kawng an endik hnuah vawiin khan Er. Lalhriatpuia, Deputy Commissioner, Aizawl district hovin Ngaizel leh Hlimena lung tlak thinna leh lung tlak mai hlauhthawnawmna hmun an endik a, khawtlang hruaitute’n an tawiawm a ni. Mihring leh lirthei veivakte tana him lo hmunte an endik zawh hnu hian Chief Minister’s Conference Hall-ah Prof. Lalnilawma, Minister, Disaster Management and Rehabilitation Department hovin hmalak dan tur ruahmanna sawi hona hun an hmang zui a. He hunah hian Pi K. Lalrinzuali, Secretary leh Pu Lalrengpuia, Director, DM&R leh ADDMA member-te an tel a ni.
DM&R Minister Prof. Lalnilawma chuan Mizoram leilung pian hmang leh ruah tui tam vanga khuarel chhiatna thleng thinte chu hriat lawk theih loh ni mah se, harsatna lian zawk thleng lova pumpelh turin tunlai thiamna thar leh tha zawkte hmang a, heng chhiatna tiziaawm tur leh titlem thei tura inpuahchah thiam a tul thu a sawi a. Chhiatrupna thlen changa Sawrkar department hrang hrangte thawhhonate, tlawmngai pawl, khawtlang leh kohhran thlenga tanrualna hmuh leh hriat tur a awm thin chu Mizoram kan vanneihna a nih thu a sawi a. Vawiina ram pawn atanga mithiamte nen Aizawl hmun hrang hranga chhiatna thlen thinna hmun zirchianna leh ruahmanna siam ho thei tura thutkhawmna hun tha buatsaih a ni chu lawmawm a tih thu sawiin, mithiamte nena endikna leh inrawnkhawmna neih chuan nakin zela chhiatna thleng tur ven leh ruahmanna siam kawngah rah tha a chhuah ngei a beisei thu a sawi a ni.
Nimin leh vawiina Pukpui, Lengpui, Ngaizel leh Hlimena lung tlakna leh leiminna hmun zirchianna chu Dr. Laldinpuia, Associate Professor, Mizoram University chuan PowerPoint Presentation hmangin a sawifiah a. Pu Mathan Chauhan, Assistant General Manager, Maccaferri Environmental Solution Pvt.Ltd. chuan hmun hrang hranga leimin leh lungtla ven nana hma an lo lak tawh dan tarlanna hun leh Aizawl chhunga hmun hrang hrang an endiknaa ruahmanna kalpui theih dante a tarlang bawk a ni. He thutkhawmnaa tarlan a nih danin Ngaizel kham phei km 1.7 a thui chu lung tlak hlauhawmna a nih thu leh chung zingah meter 405 chu ‘Very High Hazard’ a nih bakah meter 740 dang pawh ‘Vulnerable’ anga ngaih theih a ni a. Chhinchhiah danin September ni 24, 2015 leh May ni 1, 2025 inkar khan lung tla avangin lirthei chhia 26, mihring inhliam 9 leh thihna tum 3 a thleng tawh a ni. Thutkhawmnaah hian mithiamte chuan Ngaizel lung tlak thinna hmuna khamte chu rawt zawl deuh (Re-slopping) te, tui put awm nasa vente, thirlen rintlak tak hmanga tuam a concrete a phuh (Gunite) theih dante sawi lan a ni a. Kham chunga chenna in engemawzata bawlhlawh leh tui chhe paihna mumal zawk siam leh lung kara thing zung lut tam tak suat pawh a tul tur thu sawi lan a ni bawk.
