Kohhran thawhhona Council of Churches in Mizoram (CCM) chuan Lairam Isua Krista Baptist Kohhran, Lawngtlai College Veng Biakinah nimin khan nilengin seminar an buatsaih.
CCM seminar hi CCM president Rev Dr R. Lalbiakliana’n a kaihruai a, CCM general secretary Rev Dr Lalhmangaiha’n Council of Churches in Mizoram lo pian chhuah dan leh hmalam thlirna tih thupui a sawi chu huamzau taka zirho a ni. He Seminar ah hian CCM-in Mizoram dinhmun a hriat chian leh zual theihna tur te, hmalak tawh dan leh hmalam hun zel a Mizoram Kohhran hote inpumkhatna tha zawk nen zau zawk a rawng an bawl zel theihna tur hmathlir leh ruahmannate sawiho a ni.
CCM-a a tel Kohhran hrang hrang atangin seminar-ah hian mi 169 an tela, hetiang Seminar hi kumin chhungin, Siaha, Lunglei leh Aizawl ah te buatsaih chhunzawm tum a ni. Tun dinhmunah Council of Churches in Mizoram ah hian Mizorama Kohhran hrang hrang pakua an awm mek a ni.
