Zan hnih riaka Champhai District tlawh turin vawiin chawhnu khan Cooperation Minister Pu PC Vanlalruata chuan Champhai a lo thleng a. Champhai District Cooperation Office leh NABARD DDM Office te a tlawh hnuah Minister hian Champhai Town Multipurpose Cooperative Society (CTMCS) te enkawl Champhai Higher Secondary School leh Ministry of Tribal Affairs sum cheng vaibelchhe 6.2 hmanga CTMCS ten an sak mek Tribal Girls Hostel te chu a hmunah a tlawh bawk.
Pu PC Vanlalruata chuan sawrkar laipui leh Mizoram sawrkarin Cooperative Society-te tihhmasawn an ngaihpawimawh thu sawiin, Society-te tihchak chu Mizoram sawrkar thar thil tum lian ber pakhat a ni, a ti. Cooperation Minister hian society hlawhtling tak a awm theih nan thawhhona tha a pawimawh tih hre reng turin Society hrang hrang aiawh kalkhawmte chu a chah a, a hnena an mamawh an thlen hrang hrang te chu theihtawp chhuaha a bawhzui pui tur thu a sawi bawk.
Agriculture Minister ni bawk Pu PC Vanlalruata hian naktuk (12.07.2024) zing dar 7:00 hian Vaphai Block Agriculture Office, Animal Feed Mill leh Vaphai Primary Agricultural Credit Society Office-te hawng turin Vaphai panin Champhai a chhuahsan dawn a. Naktip (Inrinni, 13.07.2024) hian Champhai District Agriculture Office, Irrigation & Water Resources Office leh Large Area Multipurpose Cooperative Society (LAMPS) Office te a tlawh ang a, he mi hnu hian Aizawl a pan ang.
