Vawiin khan Mizoram Legislative Assembly Session Hall-ah Commonwealth Parliamentary Association (CPA), India Region, Region Zone – III te chuan Annual Conference vawi 21 na hmangin, Plenery Session an nei a. CPA India Regional Chairman, Lok Sabha Speaker ni bawk Pu Om Birla leh Rajya Sabha Chairman Pu Harivash Narayan Singh ten an rawn telpui. Chief Minister Pu Lalduhoma pawhin a hawnna inkhawm hi a telpui a ni. India Regional Chairman Pu Om Birla, Speaker, Lok Sabha chuan, hmarchhak bial hian hmasawnna rahbi thar a rap chho mek hi a lawmawm ka ti. Nimin khan, Aizawl ka lo luh dawnin rail kawng hna kal mek ka hmu a, min tihlim hle. State zawng zawngte hi rel kawnga thlun zawm vek a tul em em a ni. India rama investment rawn ti duh hi an tam a, hmarchhak bialah hian Tourism ah te, Agriculture ah te, Art & Culture lamah te investment nasa zawk kalpui theih niin ka ngai a. Kan inkalpawhna kawngte hi han tha lehzual se, chung hmalakna te chu chak zawkin kan kalpui thei ngei ang. Democarcy-ah chuan mipui thlan tlin keini hi mipui aw kan ni a, an harsatna leh an beseite chu kan ngaihtuah zel tur a ni. House inrelbawlna pawh tha takin kan kalpui tur a ni a. Inhnialna leh sawihona hrisel neihna hmunah i chantir tlat ang u. Democracy tichaktu chu ngaihdan hrang hrang hi a ni a. Kan ngaidan in ang lo te chu kan sawiho thin a, dan tha leh policy tha a lo chhuak thin, a ti bawk.
Chief Minister Pu Lalduhoma pawhin thusawiin, vawiin CPA member kal khawm hian kan ram chu mipuite rorelna ram, mitin huapzo leh dan lalna ram a nihzia min hriatnawntir a. Nghet taka tungding zel turin legislative zahawmna i vawnghim ang u. Ram dan hi dan siamtuten rilru thianghlim, langtlang leh mipuite thatna tura an siam a ni tih an hriat phawt chuan tha taka zawm turin mipuite hi an inpeih mai thin a ni. Commonwealth Parliamentary Association hian kan tawnhriat inhrilh kawngah te, kan inzir zelna atan te leh ngaihdan kan inhrilhtawnna kawngah te min tanpui nasa a. Vawiina kan conference pawh hi kan rama legislative ruhrel tichak zualtu leh inpawhna thuk zawk neih nan i hmang ang u, tiin kalkhawmte a sawm a ni. Pu Harivash Narayan Singh, Deputy Chairman, Rajya Sabha pawhin thusawiin, 21st CPA Conference a tel theih avanga vannei a intih thu a sawi a. Mizoram sawrkarin tha taka a lo dawnsawn avangin Mizoram Chief Minister Pu Lalduhoma leh Speaker Pu Lalbiakzama te chungah lawmthu a sawi bawk. CPA chu kum 100 aia upa tawh association tangkai, dan siamtuten kan tawn hriatte kan inhrilhtawnna leh ram bial (region) chhunga kan mamawh intawm thil pawimawh kan sawihona hmun a ni, a ti. CPA Region Zone III huam chhung state te India ram tana a pawimawhna leh ram economy tana tha an thawhhlawkzia a tarlang a. Hma a sawn zel nana tihtur hmabak pawimawh awm te a sawi lang bawk.
Pu Sharingain Longkumer, Speaker, Nagaland Legislative Assembly, Region Zone – III Chairman ni bawk chuan inkhawmpui an neih chhan leh a thil tum (keynote address) a sawi a. Pu Lalbiakzama, Speaker, Mizoram Legislative Assembly chuan palai kalte lawmna thu sawiin; dam lohna avanga Mizoram Governor Dr. Hari Babu Kambhampati chuan a telpui theih loh thu a tarlang. Chawhnu lamah “India – ASEAN hmathlir sumdawnna leh thawhhonaa hmarchhak ram te telh dan” (Inclusion of the Northeast Region in the India – ASEAN vision for Trade & Cooperation) tih thupui hmangin sawihona hun an hmang a ni. CPA India Region bik hian India rama Legislature 31 te a thlung khawm a. India Region hi Region Zone paliah an then a, vawiina conference hmang mek Region Zone – 3 hian Assam, Arunachal Pradesh, Manipur, Meghalaya, Mizoram, Nagaland, Sikkim, Tripura (8 Branches) te a huam a ni.
