Committee on Petitions, Mizoram Legislative Assembly chuan vawiin khan Kerala Legislative Assembly-a Kerala Assembly Committee on Petitions nen Committee hna thawh dan leh kalphung hrang hrangte zir chiangin inkawmhona hun a hmang.
Mizoram Legislative Assembly Committee on Petitions aṭang hian Chairman Pu T Lalhlimpuia bakah member pahnih Pu H Lalzirliana leh Pi Prova Chakmate an kal a, Mizoram Legislative Assembly Secretariat Officer leh staff ten an tawiawm bawk a. Committee on Petitions, Kerala Legislative Assembly aiawh hian Chairman Shri Antony Raju leh Member Smt KK Rema te bakah, Kerala Assembly Secretary Dr N Krishnakumar leh Assembly official-te’n lo hmuak in hun hlawkthlak tak an hmanpui.
He hun hman honaah hian Committee on Petitions case hrang hrang te sawi ho in, procedure leh proceedings inzir tawnsak bakah siam danglam an duhte sawi ho a, Committee on Petitions hi mipui leh sorkar inkara palai pawimawh tak a nih thute tarlangin mipuite’n ṭangkai zawka an chhawr theih nana hmalak dan turte an sawi ho a ni.
