Chief Minister Pu Lalduhoma leh ONGC (Exploration) Director, Sushma Rawat-i te Chief Minister Bangla-ah inkawmin Mizoram lei hnuaia gas leh tuialhthei lak chhuah chungchang an sawi dun. Pi Sushma Rawat-i hi Chief Minister rawn hmu turin nimin khan Delhi atangin a rawn kal a, a rawn thlen veleh an inkawm nghal a ni. Pi Sushma Rawat-i hian Meiduma gas an hmuhchhuah tawh chu a lakchhuahna tur hmun tha, hmun hnih hmun thumah an thlang fel tawh tih Chief Minister hi hrilhin, heng hmuna an khâwl te lakluhna turin Chhimluangtê luiah Mizoram sawrkarin lei a dawh mek a, hnathawh a muan avangin an duh hunah hna an tan thei lo, tiin lei dawh hi hmanhmawhsak turin a ngen a.
Mizoram hmun thenkhatah lei chhung atanga gas irhchhuak a awm thu sawi dunin, heng gas irhchhuahna te hi a rang lama tlawh chhuaha zirchianna neih thuai ni se, an ti a. He mi thu-ah hian Chief Minister chuan Mizoram chhunga gas leh oil irhchhuahna hria apiangten a awmna khua, lirthei kal theih chin atanga a hlat zawng, a thalak emaw video tawi leh thil tul dang awm te chu ama social media kaltlangin emaw whatsapp number 8730970574-ah emaw email cm@mizoram.gov.in-ah thawn turin mipui a ngen a ni.
Pi Sushma Rawat-i hian Mizorama Oil leh Gas lakchhuah hunah Mizo thalai, geology lama thiamna neite tan hna a tam dawn hle tih Chief Minister hi a hrilh a. He mi thu-ah hian Chief Minister chuan, Mizo thalaite Geology zirna lam lo uar tura ngenin, a zirna hmun pawh a theih anga tih-len dan sawrkarin a ngaihtuah tur thu a sawi a. ONGC hian Mizo thalaiten Geology lam zirna an uar deuh deuh theih nan a tul anga Mizoram sawrkar thawhpui an inhuam thu an sawi a ni.
