Ngopa khua a nghah, nizan atanga tan Mizoram Presbyterian thalai pawl, Kristian Thalai Pawl (KTP) Conference Vawi 60-na, Diamond Jubilee-ah palai mi 12,236 an riak lut tawh. Vawiin chawhma khan Rawngbâwlna Report Inkhawm hman niin he hunah hian Central KTP General Secretary report bakah Finance report leh Bial Report khaikhawmna report ngaihthlak a ni a.
Central KTP General Secretary Upa Lalmuanpuia’n kum 2023-24 Kristian Thalai Pawl report a tarlan danin KTP member zawng zawng hi mi nuai 1, sing 7 sang 1 za 4 leh pali a awm mek a. Mipa nuai 1 sang 4 za 7 sawmthum paruk awmin hmeichhia sing 6 sang 6 za 6 sawmruk pariat an awm a. Mizoram puma pastor bial 217 awmah KTP branch 904 a awm a ni. Nikum April ni 1 atanga kumin February ni 20 chhunga sum dinhmun report-a tarlan danin Central KTP budget hi cheng nuai 84 leh sing 7 a ni a.
Kum 2023-24 chhung hian Rs. Nuai 87 sing 4 sang 6 za 6 sawmli hmuh a ni a. Cheng nuai 53 sing 8 sang 6 za sawmriat pahnih hman a ni. Vawiin chawhnu-ah hian Jubilee Zaikhawmpui hman mek a ni a. Naktuk nileng hian Ngopa Chhimveng Kohhran Biak Inah kum 2024-26 Central KTP hruaitu thlanna hun leh Rorel Inkhawm hun te hman a ni ang.
